عاصم بخاری
| عاصم بخاری | |
| جمݨستھان : | لہور، پنجاب |
| جمݨ تریخ : | 29 اگست 1944ء |
| کم : | اداکار، پنجابی شاعر، ڈائریکٹر، لکھاری |
| شِعری لِکھتاں : | دوہریاں شکلاں سوچ اڈاری دل چڑیاں دا آہلݨا |
| اعزاز : | تمغا حسن کارکردگی (2014ء) پلاک کلچرل ایوارڈ (2019ء) |
عاصم بخاری (Asim Bukhari)، اک پاکستانی پنجابی ڈراما، تھیٹر، فلم اداکار، ڈائریکٹر، لکھاری تے پنجابی صوفی شاعر نیں۔ اوہناں نے پاکستان ٹیلی ویژن دے بے شمار ڈرامےآں وچ اداکاری کیتی اے۔ اس توں علاوہ بہت سارے ریڈیو تے ٹی وی ڈرامے لکھے۔ ڈراما، سٹیج، تھیٹر، فلم، کمرشلز وچ کم کیتا۔
مُڈھلا جیون سودھو
عاصم بخاری 1944ء نوں پنجاب دے شہر لہور وچ اندرون لہور موچی دروازے کوݪ پیدا ہوئے۔ خاندانی پچھوکڑ مذہبی سی، دادا قرآن پاک دا درس دیندے سی، نانا امام مسجد سی۔ والد بسلسہ معاش مختلف شہراں وچ ملازمت کردے رہے۔
عاصم بخاری نے عمر دے ابتدائی تن چار سال موچی دروازہ لہور وچ ای گزارے۔ اس توں بعد پنڈ رسول نگر چلے گئے، اوتھے سال دو سال رہے، اوتھے اوہناں نے کچی جماعت وچ داخلہ لیا۔ اوہ اپݨے تایا دے ناݪ رہے جو محکمہ جنگلات وچ فاریسٹ آفیسر سی، اوہناں ناݪ پہلاں جہلم فیر سرگودھے شِفٹ ہوئے۔ 16 اکتوبر 1951ء نوں سرگودھے چلے گئے۔ ابتدائی تعلیم سرگودھے دے مقامی سکولاں وِچوں حاصل کیتی، میٹرک اسلامیہ خالقیہ ہائی سکول سرگودھا توں کیتا۔ فیر اپݨے والد کوݪ کراچی چلے گئے جِتھے سندھ مسلم کالج وچ کامرس دے شعبے وچ داخلہ لیا تے کراچی وچ کامرس دی تعلیم دا آغاز کر دِتا۔
ملازمت
دوران تعلیم ای نیشنل بینک وچ ملازمت مِݪ گئی تے اوہ تعلیم وچاݪے چَھڈ کے 1962ء وچ لہور چلے گئے۔ 1962ء توں اوہ لہور رہ رہے نیں۔ اوہناں دا گھر ماڈل ٹاؤن لہور آر بلاک وچ اے۔
بینک ملازمت توں پہلاں انار کلی لہور وچ جلندھر میڈیکل سٹور اُتے کُچھ عرصہ پنجاہ روپے ماہوار اُتے ہٹی کھولݨ تے بند کرن دی ملازمت وی کیتی۔ اس توں علاوہ تھیٹر وچ وی کم کردے رہے۔
شوبز ناݪ وابستگی
1962ء وچ اوہناں نے پہلا سٹیج ڈراما کیتا۔ پی ٹی وی اُتے 1965ء وچ پہلا ٹی وی ڈراما کیتا تے 1967ء وچ پہلی فلم وچ کم کیتا۔ اوہناں نے 600 توں وَدھ ڈرامےآں وچ تے کئی فِلماں تے سٹیج ڈرامےآں وچ اداکاری کیتی اے۔
ریڈیو وچ کمپیئرنگ توں علاوہ اوہناں نے بہت سارے ریڈیو تے ٹی وی ڈرامے وی لکھے نیں۔ اک لمبے عرصے تک پنجاب رنگ دے ناں توں ریڈیو شو وی ہوسٹ کردے رہے۔
اوہناں نے کئی فِلماں وچ اداکاری کیتی بلکہ آپ وی اک فلم بݨائی۔ اوہناں دی پہلی فلم دا ناں ’’ظالم‘‘ سی۔
گھر بار
پیدائش ویلے اوہناں دا ناں سید محمد عاصم رکھیا گیا جو بعد وچ سکول سرٹیفکیٹ وچ جاݨ بجھ کے یا انجاݨے وچ آصف شاہ کر دتا گیا تے جدوں شوبز ناݪ منسلک ہوئے تے ناں عاصم بخاری کرلیا۔ عاصم بخاری نے آئی کام تک تعلیم حاصل کیتی۔ اوہناں دے والد دا ناں سید محمد قاسم سی تے والدہ دا ناں سرفراز بیگم سی تے دوویں ایس دنیا توں ازلی دنیا ول سفر کر چکے نیں۔ اوہناں دے والد 1919ء وچ لہور وچ پیدا ہوئے تے 28 اگست 1997ء نوں کراچی وچ انتقال کر گئے۔ اوہناں دی والدہ دا جم 1921ء نوں لہور وچ ہویا تے 17 نومبر 1979ء نوں لہور وچ ای انتقال ہویا۔ عاصم بخاری 29 اگست 1944ء نوں لہور وچ پیدا ہوئے۔ عاصم بخاری دا ویاہ 31 مارچ 1974ء نوں ہویا۔ ویاہ خاندان توں باہر ہویا۔ اوہناں دی اولاد وچ دو دھیاں تے دو پُتر نیں۔
اوہناں دے پُتر اجلال بخاری تے دھی معطر نے پاکستان ٹیلی ویژن دے مشہور ڈرامے عینک والا جن وچ بطور چائلڈ اداکار کم کیتا۔
کیریئر سودھو
لہور دے مُختلف دورےآں وچ تھیٹر وچ کَم کردے رہے۔ بے روزگاری دے زمانے وچ اوہ سٹیج اُتے کَم کرن دا تجربہ حاصل کر چکے سی۔ اک وار اپݨے دوست ناݪ سٹیج ڈرامے دی ریہرسل دیکھݨ گئے۔ ڈائریکٹر نے اوہناں نوں وی کَم کرن دی پیشکش کیتی، جو اوہناں نے فورن قبول کر لئی۔
رفیع خاور ننھا تے جمیل فخری اوہناں ناݪ نیشنل بینک دی اکو برانچ وچ کم کردے سی۔ نیشنل بینک نے اک ڈرامیٹک کلب دا قیام کیتا جیہنوں دیکھݨ لئی منور توفیق تے اوہناں دے شوہر توفیق اعجاز آئے۔ اوہناں دے ناݪ پی ٹی وی دا عملہ آیا۔ اوتھے عاصم بخاری نوں اداکاری کرن دا کہیا گیا۔ توفیق اعجاز نے اوہناں نوں آڈیشن لئی کہیا جیہدے متعلق اوہناں نے رضامندی دا اظہار کیتا۔ عاصم بخاری آڈیشن لئی ذکاء درانی دے کوݪ گئے، جیہنوں اوہناں نے نہایت خوش اسلوبی ناݪ نبھایا۔ ذکاء درانی نے جمعرات نوں انٹرویو لیا، اتوار نوں عاصم بخاری مال روڈ لہور اُتے پیدل جارہے سی، مسجد شہداء دے کوݪ جاندے ہوئے رفیع خاور ننھا نے اوہناں نوں دیکھ کے ہاک ماری تے ڈرامے دا سکرپٹ دتا جیہڑا اوہناں نوں مِݪݨ آݪا پہلا سکرپٹ سی۔ ایہدے ناݪ ای اوہناں دے فنی کیریئر دا آغاز ہوگیا۔ رفیع خاور ننھا اوہناں دِناں وچ نیشنل بینک وچ ای ملازم سی تے عاصم بخاری دے دے قریبی دوست سی۔
عاصم بخاری نے اپݨا پہلا ڈراما کرائے کا گھر 1965ء وچ پاکستان ٹیلی ویژن دے پلیٹ فارم توں کیتا۔ ایس ڈرامے دا معاوضہ اوہناں نوں ستر روپے مِݪیا جو اوس ویلے دے حساب ناݪ خطیر رقم سی۔ ایہدے ناݪ ناݪ اوہناں نے پی ٹی وی دے دیگر پراجیکٹس اُتے وی کَم جاری رکھیا۔ 1974ء وچ عاصم بخاری نے راشد ڈار دے پی ٹی وی دے پنجابی ڈرامے آپے رانجھا ہوئی وچ اہم کردار ادا کیتا جیہنے اوہناں نوں شہرت بخشی۔
ساس پہ ساس بہو اداس ڈراما اوہناں دی لِکھت تے ڈائریکشن سی۔
پی ٹی وی دے کئی ڈرامے لکھے۔ بہت سارے ریڈیو ڈرامے وی کیتے تے لکھے۔
عاصم بخاری نے فلماں تے سٹیج اُتے وی اداکاری دے جوہر دکھائے نیں۔
اجوکا تھیٹر دے کھیل بُلھا وچ شاہ عنایت قادری دا کردار ادا کیتا۔ اجوکا تھیٹر تے رفیع پیر تھیٹر وچ کم کیتا۔ اجوکا تھیٹر ناݪ چڑھدے پنجاب تے لندݨ وچ پرفارم کیتا۔
ڈرامے سودھو
ایہناں توں علاوہ وی عاصم بخاری دے بہت سارے ٹی وی ڈرامے نیں۔
| سال | ڈراما | چینل | کردار | نوٹ |
|---|---|---|---|---|
| 1965 | کرائے کا گھر | پی ٹی وی | ||
| 1974 | آپے رانجھا ہوئی | پی ٹی وی | پنجابی | |
| الف نون | پی ٹی وی | |||
| لاکھوں میں تین | پی ٹی وی | |||
| بھولا خنجر | پی ٹی وی | |||
| علی بابا چالیس چور | پی ٹی وی | علی بابا | ||
| تیسرا کنارہ | پی ٹی وی | |||
| سونا چاندی | پی ٹی وی | |||
| سٹیٹس | پی ٹی وی | |||
| فہمیدہ کی کہانی استانی راحت کی زبانی | پی ٹی وی | وکیل | کہانی 82 | |
| مرزا اینڈ سنز | پی ٹی وی | چوہدری صاحب | ||
| حویلی | پی ٹی وی | |||
| بخت نامہ | پی ٹی وی | |||
| اندھیرا اجالا | پی ٹی وی | |||
| ایک دن | پی ٹی وی | |||
| طوطا کہانی | پی ٹی وی | |||
| بند گلی | پی ٹی وی | |||
| گھر سے نکلے | پی ٹی وی | |||
| رشتے اور راستے | پی ٹی وی | چائنز اِشتراک | ||
| اڑان | پی ٹی وی | پی آئی اے سیریئل | ||
| حصار | پی ٹی وی | |||
| بے پرواہیاں | پی ٹی وی | |||
| تکمیل | پی ٹی وی | |||
| نزدیک | پی ٹی وی | |||
| 1994 | لارنس آف تھلیبیا | پی ٹی وی | قاسمی کہانی | |
| 1995 | زرد دوپہر | پی ٹی وی | وکیل | |
| 1996 | جنجال پورا | پی ٹی وی | شیخ صاحب | |
| کھوجی | پی ٹی وی | |||
| دستک | پی ٹی وی | |||
| ٹوٹے پتے | پی ٹی وی | |||
| بلا عنوان | پی ٹی وی | |||
| مسافتیں | پی ٹی وی | |||
| 2000 | اس پار | پی ٹی وی | بابا جانی | ڈاکیومینٹری ڈراما |
| 2001 | کاجل گھر | پی ٹی وی | حکیم | |
| 2003 | شمپک شو | پی ٹی وی | ||
| 2004 | تاحد نگاہ | پی ٹی وی | ||
| 2004 | غلام گردش | پی ٹی وی | ||
| جگ بیتی | پی ٹی وی | پنجابی | ||
| 2019 | اپنی جنت | اِنر پاکستان | شیخ صاحب | ویب ڈراما |
فِلم سودھو
اوہناں نے کئی فِلماں وچ اداکاری کیتی بلکہ آپ وی اک فلم بݨائی۔ اوہناں دی پہلی فلم دا ناں ’’ظالم‘‘ سی۔
مشہور فِلماں
- ظالم
- غُنڈا راج
- سب سے بڑا روپیا
- دبئی چلو
- دلاور خان
- البیلا عاشق
- ہنڈرڈ رائفل
پنجابی شاعری سودھو
عاصم بخاری نے پنجابی شاعری دا آغاز 1996ء وچ کیتا، اوہناں دی شاعری وچ صوفیانہ رنگ اے۔
اوہناں دا پہلا شعر :
نہ میں ٹعگھا نہ میں وچھا نہ میں بݨیا انسان
جـمـدیـاں ای کـلـبـوت دے انـدر آ بیٹھـا شـیـطـان
اوہناں دی پنجابی شاعری دیاں تن کتاباں چَھپ چکیاں نیں۔
- دوہریاں شکلاں (مئی 2000ء)
- سوچ اُڈاری (2005ء)
- دل چڑیاں دا آہلݨا
نمونہ کلام سودھو
خورے کیہ میں کر بیٹھا واں سودھو
خورے کیہ میں کر بیٹھا واں
مرن توں پہلاں مر بیٹھا واں
وچ حیاتی جیوݨ دی خاطر
سبھناں ناݪ میں لَڑ بیٹھا واں
♥ ♡ ♥ ♡ ♥ ♡ ♥ ♡ ♥ ♡ ♥
پھڑ پھڑ سَبھ نوں گݪ ناݪ لاواں
میرے نیں سبھ، دیواں صداواں
تَکدا رہنداں سَبھ دیاں راہواں
نیڑے جاݨ توں ڈر بیٹھا واں
♥ ♡ ♥ ♡ ♥ ♡ ♥ ♡ ♥ ♡ ♥
خورے کیہ میں کر بیٹھا واں
مرن توں پہلاں مر بیٹھا واں
وچ حیاتی جیوݨ دی خاطر
سبھناں ناݪ میں لَڑ بیٹھا واں
♥ ♡ ♥ ♡ ♥ ♡ ♥ ♡ ♥ ♡ ♥
چعھوٹھے ہاسے ہَسدا واں میں
نیڑے جاݨ توں چَعھکدا واں میں
دور کھلو کے تَکدا واں میں
ظلم حیاتی جڑ بیٹھا واں میں
♥ ♡ ♥ ♡ ♥ ♡ ♥ ♡ ♥ ♡ ♥
خورے کیہ میں کر بیٹھا واں
مرن توں پہلاں مر بیٹھا واں
وچ حیاتی جیوݨ دی خاطر
سبھناں ناݪ میں لَڑ بیٹھا واں
♥ ♡ ♥ ♡ ♥ ♡ ♥ ♡ ♥ ♡ ♥
سَبھ چَعھکدے نیں آؤݨ توں نیڑے
پُتر تعھی آں رانجھے کھیڑے
کوئی نئیں آؤندا میرے ویڑھے
لیکھاں ہتھوں سڑ بیٹھا واں
♥ ♡ ♥ ♡ ♥ ♡ ♥ ♡ ♥ ♡ ♥
خورے کیہ میں کر بیٹھا واں
مرن توں پہلاں مر بیٹھا واں
وچ حیاتی جیوݨ دی خاطر
سبھناں ناݪ میں لَڑ بیٹھا واں
(عاصم بخاری)
اعزازات سودھو
صدر پاکستان نے فنِ اداکاری دے شعبے وچ نمایاں کارکردگی دے اعتراف وچ عاصم بخاری نوں 14 اگست 2014ء نوں صدارتی اعزاز تمغا حسن کارکردگی عطا کیتا جو 2015ء وچ اوہناں نے وصول کیتا۔ پنجابی انسٹیٹیوٹ آف لینگوئج، آرٹ اینڈ کلچر (پلاک) نے 20 جون 2019ء نوں اوہناں دے اعزاز وچ اک تقریب دا انعقاد کیتا۔ ڈائریکٹر جنرل پلاک نے اوہناں نوں پلاک کلچرل ایوارڈ وی عطا کیتا۔ ایہناں توں علاوہ وی اوہناں نے ہور وی بہت سارے مختلف اعزازات حاصل کیتے نیں۔