ظفر اقبال

ظفر اقبال
جم	ظفر اقبال 27 سپتامبر 1933 ‏(عمر: ۹۱ سال) بہاول نگر، پنجاب
قلمی ناں	ظفر
کم کِتہ	شاعر، کالم نگار
بولی	پنجابی
قومیت	پاکستانی
نسل	پنجابی
تعلیم	بی اے، ایل ایل بی
مادر علمی	گورنمنٹ کالج لہور پنجاب یونیورسٹی
صنف	غزل، نظم، کالم
وڈے کم	ہرے ہنھیرے پنڈوکڑی تے ہور لِکھتاں
وڈے اعزاز	پرائڈ آف پرفارمنس
نیاݨے	آفتاب اقبال، جنید اقبال

ظفر اقبال (جم: 27 ستمبر، 1932ء) پنجاب پاکستان دے مشہور پنجابی تے اردو شاعر تے کالم لکھاری نیں ۔ اوہناں دے پُتر آفتاب اقبال مشہور ٹیلی وژن اینکر ، سوجھواݨ ، کالم لکھاری تے صحافی نیں ۔

مُڈھلا جیون

ظفر اقبال 27 ستمبر 1932ء نوں بہاول نگر، پنجاب وچ پیدا ہوئے ۔ اوہناں دے والد پنڈ چک نمبر 49/3R ضلع اوکاڑا دے اک معزز زمیندار سن ۔

پڑھائی

ظفر اقبال نے مُڈھلی پڑھائی بہاول نگر توں ای کیتی تے میٹرک ایم سی ہائی سکول اوکاڑا توں 1950 وچ کیتا ۔ انٹرمیڈیئٹ ایف سی کالج لہور تے گریجوئیشن گورنمنٹ کالج لہور توں کیتی ۔ ظفر اقبال نے ایل ایل بی دا امتحان لاء کالج پنجاب یونیورسٹی توں پاس کیتا ۔

وکالت

وکالت دا امتحان پاس کرن مگروں اوہناں نے اوکاڑا کچہری وچ پریکٹس شروع کر دِتی ۔ اوہ اک وار اوکاڑا بار ایسوسی ایشن دے صدر بݨے ۔ پہلاں اوہناں نے اوکاڑے فیر لہور وچ 2003 تک بحیثیت اٹارنی پریکٹس کیتی ۔

کالمز

ظفر اقبال دے وکھو وکھ اخباراں وچ 'دال دلیا' دے سرلیکھ ہیٹھ چھپݨ آلے کالم اپݨے پڑھݨہاراں دا کُھلا پسار رکھدے نیں ۔ ظفر اقبال دو وار اوکاڑا پریس کلب دے صدر رہ چکے نیں ۔

شاعری تے ادبی خدمات

ظفر اقبال اک مشہور پنجابی تے اردو شاعر نیں ۔ پرائمری سکولنگ ویلے ای اوہناں دا دھیان تے رجحان شاعری ول ہوگیا سی ۔ اوہناں دے استاد نور احمد انجم قریشی آپ وی شاعر سن تے پڑھیار نیاݨےآں نوں وی املاء دے طور تے شعر لکھ کے دیندے سی ۔ شفیق الرحمان دیاں لِکھتاں پڑھ کے اوہناں وچ لکھݨ دی تحریک پیدا ہوئی ۔ اوہناں نے غزل دے پیرائے وچ فنی تے موضوعاتی پدھر اُتے روایت توڑن دے حوالے نال اپݨی اک وکھری تے بھرویں پچھاݨ بنائی ۔ 1973 وچ اوہناں نے پہلا کالم سرور سکھیرا دے پرچے دھنک وچ لکھیا ۔ کلاسیکی شاعرااں توں اُلٹ ظفر دی شاعری محبت نوں مافوق الفطرت دے بجائے سائنسی تے جسمانی طور تے پیش کردی اے ۔ ڈاکٹر تبسم کاشمیری نے اوہناں نوں 20 ویں صدی دی ادب دی تجدید قرار دتا ۔ سابق وزیر اعلا پنجاب ، حنیف رامے اوہناں نوں نویں ڈھنگ تے نویں تصوراں دا شاعر کہندے سی ، اوہ آپ وی اک لکھاری تے ادبی نقاد سی ۔ ظفر اقبال 16 فروری 1995 توں 1 مارچ 1997 تک اردو سائنس بورڈ دے آگو رہ وی چکے نیں ۔

لِکھتاں

شاعری دے مجموعے

• پنڈوکڑی
• تمیجد
• تقویم
• تشکیل
• تجاوز
• توارد
• تساہل
• ہائے ہنومان
• اب تک
• خشت زعفران
• اطراف
• گُلِ آفتاب
• ہرے ہنھیرے

کتاباں

• آبِ رواں
• گُلِ آفتاب
• رطب و یابس
• غبار آلود سِمتوں کا سراغ
• سرِ عام
• عیب و ہُنر
• وہم و گماں

اعزازات

صدر پاکستان نے اوہناں دی سلاہݨ جوگ خدمات اُتے 1999 وچ اوہناں نوں پرائڈ آف پرفارمنس عطا کیتا ۔ 2014 وچ صدر پاکستان ولوں اوہناں نوں ہلال امتیاز نال نوازیا گیا ۔

پنجابی شاعری دی اک جھات

پنجابی نظم

اوہ مونھ زور ہوا دا لہرا، میں دیوے دی لَمب ۔ ۔ جیوں جیوں میرے نیڑیوں لنگھے، تیوں تیوں جاواں کَمب

سارے باغ وچ پیا رہیا اوہدی خُشبو دا شور ۔ ۔ گھاء وچ ستا سی طوطے دا ٹُکیا ہویا اَمب

نہ بدل اسماناں اُتے، نہ زمیناں تے پاݨی ۔ ۔ مینوں پھیتی پھیتی کر گئی کیہڑے مینھ دی جَھمب

فرشاں تے عرشاں دے پینڈے مُک گئے جد دا میں ۔ ۔ اپݨے بوہے تے آ بیٹھا توڑ کے اپݨے کَھمب

میں پہیے دے تھلے، گھوڑا نہر وچ ڈِگھ پیا ۔ ۔ ایسے پُل اُتے آ ٹُٹݨا سی ٹانگے دا بَمب