عالم لوہار

پنجابی لوک گلوکار


عالم لوہار پنجابی دے لوک گلوکار سی ۔ عالم لوہار 1928 نوں پنجاب دے ضلع گجرات تحصیل کھاریاں دے اک پنڈ آچھ گوچھ وچ اک لوہار ٹبر وچ جمے ۔ عالم لوہار نے 13 ورھیاں دی عمر توں گلوکاری دا آغاز کیتا سی ۔ چمٹے نال گانا اوہناں دا مُنفرد انداز سی جیہنوں اوہناں دے پُتر عارف لوہار نے جاری رکھیا ۔ عالم لوہار نے اپݨے لوہار گھرانے دے حوالے نال لوہارے دے فن وچ مکمل کاریگری سکھی ۔ پڑھن لکھن لئی اوہناں نوں اپنے نانکےآں دے پنڈ اپنے مامے ہوراں کول جانا پیا ۔ اوہناں دے ماموں اہل ذوق سن ۔ موسیقی دیاں محفلاں تے میلےآں وچ عالم نوں نال لے جاندے سن ۔ ہولی ہولی اوہناں اکٹھاں وچ عالم لوہار نے آپ وی گیت گونے شروع کر دِتے ۔ اپنا آبائی پیشہ وی کجھ سال جاری رکھیا تے موسیقی وی نال نال پروان چڑھدی رہی۔ دسویں جماعت دا امتحان پاس کرن مگروں چوکھا دھیان موسیقی ول ہو گیا۔ مشک ملا وانگوں کجھ رکاوٹاں معاشرتی طور تے پیش آئیاں پر اک صوفی دی دعا نال فیر گانا شروع کر دتا ۔ صوفیاں نے سدا توں موسیقی دی سرپرستی کیتی اے تے پاکیزہ موسیقی راہیں عام لوکائی دے ذوق نوں اُچیرا کیتا تے ایہدے نال نال لوکاں نوں روحانیت والے پاسے لیاندا ۔ عالم لوہار دی آواز عوامی موسیقی لئی موزوں ترین سی۔ آواز دی رینج بلندیاں نوں چھوندی سی ۔ پنڈاں تھاواں تے کُھلیاں فضاواں وچ اجیہی آواز دا جادو دوگنا ہو جاندا اے ۔

عالم لوہار

Alam Lohar

ناں : محمد عالم لوہار
جنمستھان : آچھ، ضلع گجرات، پنجاب
جمݨ ورھا : 1928
مرنستھان : لہور
مرن تریخ : 3 جولائی 1979
پیشا : گلوکاری
خاصیئت : پنجابی لوک گلوکاری
ساز : چمٹا
پُتر : عارف لوہار
اعزاز : پرائڈ آف پرفارمنس

اوہناں دا معاملا ذرا وکھرا سی ۔ اوہ لوہے نوں موم کردا سی۔ آواز دیاں سختیاں نوں ایس طرحاں سوز و گداز نال پیش کردے سی کہ کسے دے کن نوں سختی محسوس نہ ہووے بلکہ ہر نغما لوکاں دے دلاں وچ لہہ جاوے ۔ اوہناں دی مقبولیت نوں دیکھ کے ریڈیو ، ٹیل یویژن تے فلم والیاں نے اوہناں کولوں نغمے گوائے ۔ برطانیا، آئرلینڈ، کینیڈا، لہندے ایشیا تے دوجے ملکاں والیاں وی اوہناں نوں اپنے ملکاں وچ بلایا سگوں بار بار بلایا۔ ایہہ وی عالم لوہار دی خوش قسمتی اے جے اوہناں نوں اپنے دور وچ پاکستان دی دوجے ملکاں وچ مقبولیت بنان وچ سبھ توں زیادہ حصا مِلیا ۔

اپنے تھیٹر راہیں ملک دے کونے کونے وچ اوہناں پنجاب دی موسیقی نوں عام کیتا۔ ایس توں اڈ ہر علاقے دی موسیقی تے نغمیاں نوں وی اپنے خزانے وچ شامل کیتا۔ فیر ایہ سارا خزانا عالمی پدھر تے عام کیتا۔ اوہناں دیاں ایہناں خدمتاں نوں دیکھ کے 1979ء وچ حکومت نے اوہناں نوں پرائڈ آف پرفارمنس عطا کیتا ۔ اک واری اک حادثے دا شکار ہوئے پر ایس حادثے دا دُکھ وی خوش دلی نال گاؤندیاں ہویاں برداشت کیتا ۔

پنجابی عوامی موسیقی دے لوک رنگ نوں جیہڑے موسیقاراں نے خوبصورت انداز وچ پیش کیتا اوہناں دے ناں نیں ماسٹر جھنڈے خاں، ماسٹر غلام حیدر، کالے خاں، خواجہ خورشید انور، بابا جی اے چشتی، وزیر افضل، عبد الحق قریشی تے ماسٹر عبد اللہ۔ جیہڑے فنکاراں اپنے اپنے انداز تے اپنی پسند دی صنف وچ رج کے خدمت کیتی اوہناں دے ناں ایہہ نیں، طفیل نیازی، عنایت حسین بھٹی، بالی جٹی، عنایت کوئیا، ریشماں، سائیں اختر حسین، مولوی نور محمد ایمن آبادی، شریف غزنوی، نذیر بیگم، زینت بیگم، محمد صادق، محمد اقبال، شوکت علی، حامد علی بیلاتے ایہناں ساریاں دی مکمل ترجمانی پاکستان دی گلی گلی تے دنیا دے مختلف ملکاں وچ سبھ توں زیادہ خدمت کرن دا سہرا عالم لوہار دے سر تے وے، ایس واسطے اوہناں نوں شہنشاہِ عوامی موسیقی وی کہیا جاسَکدا اے ۔

ہور دیکھو سودھو