چیچا وطنی پنجاب پاکستان دے ضلع ساہیوال دی تحصیل چیچا وطنی دا اک شہر اے ۔ ایہ شہر تحصیل چیچا وطنی دا راجگڑھ اے ۔ چیچا وطنی ساہیوال شہر توں لہندے پاسے 45 کلومیٹر دے فاصلے تے وسدا اے ۔ چیچا وطنی دریائے راوی دے کبھے کنڈھے توں کچھ کلومیٹر دور لہور کراچی جی ٹی روڈ تے آباد اے ۔ ایہہ لہور کراچی جی ٹی روڈ تے فیصل آباد وہاڑی روڈ دے سنگم تے واقع اے ۔

چیچا وطنی
Chichawatni

دیس : پاکستان
صوبا : پنجاب
ضلع : ساہیوال
تحصیل : چیچا وطنی
لوک گݨتی :
بولی : پنجابی

چیچا وطنی دا علاقا نہر لوئر باری دوآب توں نکلن آلیاں نہراں 12 ایل ، 11 ایل تے 14 ایل ، نال سیراب ہندا اے تے کپاہ تے جھونے دی پیداوار لئی مشہور اے ۔

چیچا وطنی دے نیڑے انگریزاں دا ریل گڈیاں دے بھاف آلے انجناں نوں ایندھن مہیا کرن لئی لائیا ہوئیا جنگل اج وی قائم دائم اے تے پاکستان دے چند مشہور جنگلاں چوں اک اے ۔

چیچا وطنی دا موجودہ شہر انگریزاں نے لہور کراچی ریلوے ٹریک بچھان دے بعد اس ٹریک تے اک نکے جہے قضبے دی شکل چ آباد کیتا سی ۔ جدوں اصل چیچا وطنی شہر ، جیہنوں پراݨا چیچا وطنی آکھیا جاندا اے ، لوئر باری دوآب نہر دے دوجے پاسے کمالیا آلے پاسے وا‍‏قع اے ۔

چیچا وطنی شہر دی آبادی تقریبن 1 لکھ اے ۔

تحصیل چیچا وطنی وچ تقریبن 200 توں ودھ پنڈ شامل نیں تے پنڈاں وچ آبادی دی اکثریت جٹآں تے مشتمل اے تے دوجے قبیلےآں وچ راجپوت ، آرائیں ، ڈوگر وغیرا شامل نیں ۔

جٹاں دے قبیلےآں وچ ایتھے دھوتھڑ ، اولکھ ، ورک ، سپرا ، وینس ، وڑائیچ ، ڈھلوں وغیرا آباد نیں ۔

چیچا وطنی دے مشہور پنڈاں چ چک 44 باراں ایل ، چک 45 باراں ایل ، چک 168 نو ایل ، چک 31 گیاراں ایل وغیرا شامل نیں ۔