KKH.png

شاہراہ قراقرم پاکستان نوں چین نال ملاوݨ دا زمینی ذریعا اے ۔ ایہنوں قراقرم ہائی وے یا شاہراہ ریشم وی کہیا جاندا اے ۔ ایہ دنیا دے عظیم پہاڑی سلسلےآں کوہ قراقرم تے ہمالیا نوں عبور کردی اے ۔ درہ خنجراب دے مقام تے سطح سمندر توں اسدی بلندی 4693 میٹر اے ۔ ایہہ چین دے صوبہ سنکیانگ (مشرقی ترکستان) نوں پاکستان وچ گلگت نال ملاوندی اے ۔ ایہ جگ دی بلند ترین بین الاقوامی شاہراہ اے ۔ ایہ 20 سال دے عرصے وچ 1986ء وچ مکمل ہوئی سی ۔ ایہنوں پاکستان تے چین نے مِل کے بنایا اے ۔ ایہنوں تعمیر کردے ہوئے 810 پاکستانیاں تے 82 چینیاں نے اپنیاں جاناں دتیاں ۔ ایہدی لمبائی 1300 کلومیٹر اے ۔ ایہ کاشغر شہر توں شروع ہندی اے تے پاکستان وچ ہنزا ، نگر ، گلگت ، چلاس ، داسو ، بشام ، ایبٹ آباد ، ہری پور توں ہُندی ہوئی حسن ابدال دے مقام تے جی ٹی روڈ نال مل جاندی اے ۔ اِنڈس دریا ، دریائے گلگت ، دریائے ہنزا ، نانگا برپت تے راکا پوشی ایہدے نال نال واقع نیں ۔ ایہ شاہراہ ، کوہ قراقرم دے مشکل پہاڑی علاقے وچ بنائی گئی اے ایس لئی ایہنوں دنیا دا اٹھواں عجوبا وی کہیا جاندا اے ۔