وکیپیڈیا

راگنی


راگنی (جم:1922 - وفات : 27 فروری 2007) ایک پنجاب پاکستان دی اک فلم اداکارہ سی ۔ اوہناں دااصل ناں شمشاد بیگم سی ۔ 1940ء دے دہاکے وچ اوہناں دا شہرا سی ۔ اداکارہ راگنی نے پہلاں ہندوستانی تے فیر تقسیم برصغیر توں بعد پاکستانی فلماں وچ کَم کیتا ۔ ہرنی ورگیاں اکھاں دی مالک راگنی نے ہندی، اردو تے پنجابی وچ اداکاری کیتی ۔

راگنی (شمشاد بیگم)

Ragini (Shamshad Begum)

اصل ناں : شمشاد بیگم
جنمستھان : گجرانوالا، پنجاب
جمݨ ورھا : 1922
مرنستھان : لہور
مرن تریخ : 27 فروری 2007
کم : فِلمی اداکارہ
نیاݨے : عابد (پُتر)، سائرا (دھی)


فوٹو لوبی کارڈ


اداکاری دا آغاز سودھو

اوہناں دی پہلی فلم ’’دُلا بھٹی‘‘ سی جو 1940 وچ رلیز ہوئی ۔ اس فلم وچ اوہناں دے مقابل ایم ڈی کنور سی ۔ ’’دلا بھٹی‘‘ ’روپ. کے. شوری’ دی فلم سی ۔ فلم نے زبردست کامیابی حاصل کیتی تے راگنی راتو رات شہرت دیاں بلندیاں اُپر پہنچ گئیاں ۔ اس توں بعد راگنی نے کئی ہندی تے پنجابی فلماں وچ اپݨی اداکاری دا سکہ جمایا ۔ ایہناں وچ سہتی مراد (1941)، نشانی (1942)، راوی پار (1942)، پونجی (1943)، داسی (1944) تے کیسے کہوں (1945)شامل نیں ۔ 1945 وچ جد اے آر کاردار نے اوہناں نوں اپݨی فلم ’’شاہ جہاں‘‘ وچ کاسٹ کیتا تاں اس ویلے تک اوہ ہندوستانی فلماں دی مہنگی ترین اداکارہ بݨ چکیاں سن ۔ کہیا جاندا اے کہ اوہناں نے فلم ’’شاہ جہاں‘‘ وچ ممتاز محل دا کردار ادا کرن لئی اک لکھ روپے معاوضا وصول کیتا ۔ 1945 وچ اک لکھ روپئیا بڑی وڈی رقم سی ۔ 1945 وچ ای راگنی نے فلم ’’شیریں فرہاد‘‘ وچ شیریں دا کردار ادا کیتا تے اس فلم توں وی اوہناں نوں بہت شہرت ملی ۔ اوہناں دے مقابل جینت (زکریا خان) فرہاد دے روپ وچ جلوہ گر ہوئے سی ۔ جینت مشہور بھارتی اداکار امجد خان المعروف گبھر سنگھ دے والد سی ۔ 1946 وچ راگنی نے ایس ایم یوسف دی فلم ’’نیک پروین‘‘ وچ اپݨی خوبصورت اداکاری دے جوہر دکھائے ۔ ایہ اک مسلم سوشل فلم سی جو بہت کامیاب رہی ۔ 1946 وچ رلیز ہوݨ آلیاں کامیاب ترین فلماں وچوں اک ’’نیک پروین‘‘ سی ۔ کہیا جاندا اے کہ ’’انمول گھڑی‘‘ توں بعد سبھ توں زیادہ ’’نیک پروین‘‘ نے بزنس کیتا ۔ تقسیمِ برصغیر توں بعد راگنی نے دو بھارتی فلماں وچ کَم کیتا پر ایہ فلماں زیادہ کامیاب نہ ہو سکیاں ۔

ایم ڈی کنور دا تعلق سودھو

راگنی دی زندگی وچ ایم ڈی کنور دا بڑا کردار رہیا ۔ اوہناں دا پورا ناں محمد دین کنور سی ۔ اوہ لہور دے بہت متمول گھرانے نال تعلق رکھدے سی ۔ کہیا جانددا اے کہ ایہ شوقیا فنکار سی تے راگنی نال دیوانگی دی حد تک عشق کر دے سی ۔ اوہناں نے راگنی دا دل جِتݨ دی بہت کوشش کیتی پَر راگنی دی سرد مہری توں اوہ سخت دل برداشتا ہوئے ۔ کئی فلمی پنڈتاں دا دعوا اے کہ اے۔ آر۔ کاردار دی رلیز ہوݨ آلی فلم ’’شاہ جہاں‘‘ (1945) وچ سارا سرمایا ایم ڈی کنور نے لایا سی تے اوہ آپ راگنی دے مقابل شاہ جہاں دے کردار وچ سامݨے آئے ۔ کئیاں لوکاں دی رائے وچ ایم ڈی کنور نوں راگنی دا عشق لے ڈُبیا ۔ ایہ یکطرفہ عشق سی جیہدی ناکامی دا ایم ڈی کنور نوں بہت دکھ ہویا ۔ دولت دا سورج وی غروب ہُندا گیا ۔ اوہ بے بسی دی تصویر بݨے اس جہان توں رخصت ہو گئے ۔

پاکستان بݨݨ مگروں فلمی سفر سودھو

پاکستان بݨݨ مگروں راگنی نے جیہناں فلماں وچ کَم کیتا ایہناں وچ ’’مندری‘ بے قرار‘ کندن‘ غلام‘ گمنام‘ نوکر‘ شرارے‘ بیداری‘ انارکلی‘ گہرا داغ‘ سیاں‘ تاج محل‘ سلطان‘ سدھا رستا‘‘ خاص طور تے قابل ذکر نیں ۔ فلم ’’تاج محل‘‘ ایس ٹی زیدی نے بݨائی سی جو ’’مغل اعظم‘‘ دے معاون ہدایتکار سی ۔ اوہناں نے پاکستان وچ ’’تاج محل‘‘ بݨائی تاں راگنی نوں نور جہاں دا کردار دِتا جو اوہناں نے بڑی خوبصورتی نال ادا کیتا ۔ جہانگیر دا کردار ریحان تے شاہ جہاں دے روپ وچ محمد علی جلوہ گر ہوئے سی ۔ حبیب نے شیرازی تے یوسف خان نے شہزادا شہریار دا کردار ادا کیتا سی ۔ اس فلم وچ سبھ توں متاثر کن اداکاری راگنی دی سی ۔

نِجی جیون سودھو

راگنی حسین و جمیل ہوݨ توں علاوہ بہت اچھی اداکارہ وی سی تے اوہناں دی آواز دا سحر وی شائقین نوں سحر زدہ کر دیندا سی ۔ اوہ بڑی بے باک تے صاف گو سی ۔ اپݨے کیرئیر دے دوران کوئی اوہناں نوں سچ دے اظہار توں نہ روک سکیا ۔ اوہناں دے بارے وچ ایہ گل وی مشہور ہو گئی کہ اوہ بہت مغرور نیں ۔ بہت سارے لوکاں دا کہݨا اے کہ اس غرور دی وجہ توں اوہناں نے ایم ڈی کنور دی محبت نوں ٹھکرا دتا ۔ اوہناں نے 1940 دے دہاکے وچ ای محمد اسلم نامی شخص نال ویاہ کر لیا جیہناں وچوں اوہناں دے دو بچے سائرہ تے عابد پیدا ہوئے ۔ راگنی دا محمد اسلم نال ویاہ زیادہ دیر تک قائم نئیں رہ سکیا ۔ راگنی نے 1947 وچ دوجا ویاہ اک اداکار تے فلمساز ‘ایس گل‘ نال کرلیا ۔ ایس گل نے ای اوہناں نوں اپݨی فلم ’’بے قرار‘‘ وچ اپݨے مقابل کاسٹ کیتا ۔

آہو چشم (ہرنی دی اکھ) دا خطاب سودھو

فیض احمد فیض نے کہیا سی : تیری صورت سے ہے عالم میں بہاروں کو ثبات ، تیری آنکھوں کے سِوا دنیا میں رکھا کیا ہے ، لگدا اے کہ خورے ایہ شعر اداکارہ راگنی واسطے ای کہیا گیا سی ۔ اوداں تاں ہندوستان دی فلمی صنعت وچ اکھاں دے حوالے نال ہور وی اداکاراواں دے ناں لئے جا سکدے نیں جیہناں وچ پری چہرہ نسیم بانو، بیگم پارہ تے پاکستان دیاں دو اداکاراواںں شاہینہ تے راݨی خاص طور تے قابل ذکر نیں پَر آہو چشم (ہرنی دی اکھ) دا خطاب راگنی نوں ای دِتا گیا ۔ راگنی نے کئی دہاکے پہلاں پی ٹی وی دے اک پروگرام وچ ایہ انکشاف کیتا سی کہ مینوں آہو چشم دا خطاب اک صحافی نے دِتا سی پَر اس صحافی دا ناں معلوم نئیں ہو سکیا ۔

وفات سودھو

ہور کئی فنکاراں ونگوں راگنی دی حیاتی دے آخری دن زیادہ چنگے نئیں گزرے ۔ فلم والے حسب روایت اوہناں نوں فراموش کر چکے سی ۔ اوہ 27 فروری 2007 نوں 85 ورھےآں دی عمر وچ لہور وچ چلاݨا کر گئیاں ۔

فِلموگرافی سودھو


ہور دیکھو سودھو

"https://pnb.wikipedia.org/w/index.php?title=راگنی&oldid=572580" توں لیا