جنوبی ایشیا دیاں بولیاں
جنوبی ایشیا دا خِطہ بھارت، پاکستان، بنگلا دیش، نیپال، سری لنکا، مالدیپ تے بھوٹان دے ممالک وچ پھیلیاں ہوئیاں کئی سو بولیاں دا گھر اے۔ ایہ دُنیا دیاں وڈیاں بولیاں ہندی، بنگالی تے پنجابی دا مرکزی خِطہ اے۔ ایتھے دیاں بولیاں زیادہ تَر ہند آریائی ٹبر دیاں بولیاں نیں تے ایہناں توں علاوہ دراوڑی، تبتی، آسٹروشیٹک ٹبر دیاں بولیاں وی شامل نیں۔
جنوبی ایشیائی انگریزی نوں جنوبی ایشیائی مُلکاں دی بین الاقوامی بولی منیا جاندا اے۔
بھارت دیاں بولیاں سودھو
بھارت وچ بولیاں جان والیاں زیادہ تر بولیاں ہند آریائی (c. 74%)، دراوڑی (c. 24%) یا آسٹروآشیٹک (منڈا) (c. 1.2%) نال تعلق رکھدیاں نیں۔ SIL Ethnologue بھارت لئی 461 زندہ بولیاں دی فہرست دیندا اے۔
ہندی بولی بھارت دی سَبھ توں زیادہ بولی جان والی بولی اے۔ ہندی دے مقامی بولن والے %39 بیان کیتے گئے نیں۔ بنگالی، مغربی بنگال، تری پورا تے آسام وچ بولی جاندی اے۔ ہور قابل ذکر بولیاں وچ اوڑیا، تیلگو، پنجابی، مراٹھی، تامل، اردو، سندھی، کنڑ، ملیالم، میتھلی، میتی، کونکنی تے تولو شامل نیں۔
پاکستان دیاں بولیاں سودھو
پاکستان لسانی اعتبار نال متنوع مُلک اے۔ پاکستان دیاں وڈیاں بولیاں ہند آریائی ٹبر دیاں بولیاں نیں۔ پاکستان دے مشرقی علاقے ہند آریائی بولیاں بولدے نیں تے مغربی علاقے ایرانی بولیاں بولدے نیں۔ پاکستان وچ سَبھ توں زیادہ بولی جان والی زبان پنجابی اے تے اردو تے انگریزی سرکاری بولی اے۔ دیگر بولیاں وچ سندھی، ڈھاٹکی، پارکری، لاسی، بلوچی، مکرانی، براہوئی، پختو، وزیری، پشتو، کالامی، کھوار، توروالی، کوہستانی، ہندکو، شینا، برشسکی، وخی، تے بلتی شامل نیں۔
بنگلادیش دیاں بولیاں سودھو
بنگالی، بنگلا دیش دی قومی بولی اے۔ بنگلا دیش دے لوکاں دی اکثریت بنگالی بولدی اے۔ بنگلا دیش دیاں ہور بولیاں سلہٹی، چٹاگونی، روہنگیا، وار تے چکما نیں۔
سری لنکا دیاں بولیاں سودھو
سنہالی تے تامل سری لنکا دیاں سرکاری بولیاں نیں، سری لنکا وچ انگریزی وی سرکاری بولی دے طور تے ورتی جاندی اے۔ تامل اک جنوبی دراوڑی بولی اے تے سنہالی دا تعلق انسولر انڈک ٹبر نال اے۔
مالدیپ دیاں بولیاں سودھو
دیویہی مالدیپ دی قومی بولی اے تے %95 آبادی ایہ بولی بولدی اے۔ انگریزی نوں تعلیم تے سیاحت ورگے بین الاقوامی مقاصد لئی بطور ذریعہ تعلیم ورتیا جاندا اے۔
نیپال دیاں بولیاں سودھو
نیپال دیاں زیادہ تر بولیاں یا تاں ہند آریائی بولیاں نیں یا چینی تبتی بولیاں دے تحت نیں۔ مُلک دی سرکاری بولی نیپالی اے، جو ہند آریائی ٹبر دا حصہ اے تے آبادی دی اکثریتی بولی اے۔
نیپال وچ بولیاں جان والیاں ہور ہند آریائی بولیاں وچ میتھلی، بھوجپوری تے تھارو شامل نیں، جنوبی نیپال وچ ترائی دے علاقے وچ ایہناں بولیاں بولن والےآں دی اکثریت اے۔ چینی تبتی بولیاں وچ تمنگ، نیواری، ماگر، گرونگ، کرانتی تے شیرپا بولیاں شامل نیں تے اکثر وسطی تے شمالی نیپال وچ پہاڑی علاقےآں وچ بولیاں جاندیاں نیں۔