کٹوا گوشت

کٹوا گوشت پنجاب دے ضلع اٹک دا وڈے گوشت دا اک پراݨا تے روایتی پنجابی پکوان اے ۔ کٹوا گوشت مٹی دے برتݨاں وچ پکایا تے کھادا جاݨ والا وڈے گوشت دا پکوان اے جیہڑا مختلف تقریباں ، تہواراں تے کَٹھ اُتے تیار کیتا جاندا اے ۔ دَس کلو گرام گوشت مٹی دے کٹوے وچ تیار کرن لئی چھے توں سَت کعھینٹھے لَگدے نیں ۔ سادا تے عام مسالےآں نال تیار کیتا جاݨ آلا اِنتہائی لذید کٹوا گوشت لگاتار 5/6 کعھینٹھےآں توں بعد پَکدا اے ۔ چھچھ ، حسن ابدال ، حضرو تے اٹک دے لوک اَج وی کٹوا گوشت بڑے شوق نال کھاندے نیں ۔ کٹوا گوشت مٹی دے برتݨ وچ ای بݨایا تے مٹی دے برتݨ وچ ای کھادا جاندا اے ۔ مٹی دے برتݨ (جیہنوں شرکوٹی کہیا جاندا اے) وچ کَعھر دی کݨک نال بݨیاں ہویاں روٹیاں نوں ہتھاں نال چورا کر کے کٹوا گوشت دا مزا دوبالا کیتا جاندا اے ۔ لوک بیاہواں تے عید میلاد النبی دیاں محفلاں وچ لوک جؤ دے دیسی کعھے وچ تیار حلوے تے کٹوا گوشت دا شوق نال اہتمام کردے نیں تے ایہناں روائتی پکواناں نوں کھاݨ لئی رشتے داراں ، آنڈھ گوانڈھ تے سجݨاں بیلیاں نوں خاص طور تے سدا دِتا جاندا اے ۔