وادی نگر

وادی نگر
Nagar
مُلک :	پاکستان
صوبا :	گلگت بلتستان
ضلع :	نگر
رقبا :	مربع کلومیٹر

وادی نگر، پاکستان دے صوبا گلگت بلتستان دے ضلع نگر وچ اک وادی اے جیہڑی شاہراہ قراقرم اُتے واقع اے۔ ایتھے دے باشندے، جیہڑے کہ بروشو کہلاؤندے نیں، شمال دے قدیم ترین تے اولین آبادکار لوک نیں۔ ایتھے دے لوکاں دی بولی بروشسکی اے ۔

موسم

نگر دی آب و ہوا سردیاں وچ سخت سردی تے گرمیاں چ موسم خوشگوار ہُندا اے۔ سردیاں وچ پالا منفی 10 ڈگری سینٹی گریڈ تک ہندا اے، جد کہ گرمیاں چ درجہ حرارت 15 ڈگری سینثی گریڈ تک ہندا اے۔

لوک

نگر دے لوک بہت مہمان نواز نیں ، ایتھے دے لوک امن پسند تے مہماناں دا خیال رکھݨ آلے نیں۔ نگر دے لوک بروشو قوم نال تعلق رکھدے نیں تے آبادی دی وڈی تعداد بروشسکی بولی بولدے اے تے کچھ وخی تے شینا بولی وی بولدے نیں۔ ایس توں علاوا اردو تقریبن سبھ لوک بولدے نیں۔

تریخ

نگر دی تریخ بہت پراݨی اے۔ ایہ پہلاں بروشال دے ناں نال مشہور سی جیہدا راجگڑھ کیپل ڈونگس سی۔ ایتھے دے راجے تھم کہلاؤندے سن تے ایہ اج دے نگر تے ہنزا اُتے مشتمل سی۔ چونکہ کیپل ڈونگس دے چار چوفیرے برفانی گلیشیئر سن، جیہناں دے ودھݨ نال ایتھے دا آبپاشی دا نظام بہت متاثر ہویا تے ایتھوں لوک ہوپر وچ آباد ہوگئے۔ ایس توں مگروں راجا میور خان دے پتراں مغلوٹ تے گرکس نے بروشال نوں نگر تے ہنزا وچ ونڈ لیا۔

نگر دے پہاڑ

نگر وچ بہت سارے چھوٹے وڈے پہاڑ نیں جیہناں وچ راکا پوشی 7788 میٹر، گولڈن پیک 7027 میٹر، دیران 7275 میٹر تے اس توں علاوہ بیافو گلیشیئر مشہور نیں۔

اینگلو بروشو جنگ

نگر تے ہنزا چھوٹیاں ریاستاں سن تے ایہ اپݨی آمدݨی دا زیادہ حصہ چین توں آؤݨ آلے تجارتی قافلےآں نوں لٹ کے حاصل کردیاں سن۔ چونکہ انگریز ایتھوں روس تک تجارت کرنا چاؤہندے سی پر ایہ ریاستاں ایداں کرن توں روک رہیاں سن۔ اس لئی 1891ء وچ کرنل ڈیورنڈ دی اگوائی وچ نگر اُتے حملے دا فیصلہ کیتا گیا تے نگر ول فوجاں دی پیش قدمی شروع ہو گئی۔ انگریزاں نے 6 مہینے تک نلت قلعے دا محاصرہ کیتا، آخر اک غدار دی مدد نال انگریز فوج قلعے دے اتلے پاسے اک چوٹی اُتے پہنچ گئی تے قلعے اُتے حملہ کر دتا۔ ایداں نگر دی ہزاراں سالاں تے مشتمل آزادی ختم ہوگئی۔ اس جنگ وچ انگریز فوج نوں 4 وکٹوریہ کراس مِلے جیہڑے اصل وچ نگر دی چھوٹی جہی فوج دی بہادری دا اعتراف اے۔

محل وقوع

نگر دے لہندے پاسے گلگت، چڑھدے پاسے چین، اُبھے پاسے ہنزا تے لمے پاسے بلتستان اے۔ گلگت توں 40 کلومیٹر دے پندھ تے نگر دی پہلی آبادی چھلت آؤندی اے جیہڑی نگر دے شمال وچ واقع اے۔ ایہ شمال ول نگر دی واحد آبادی اے۔

گلگت بلتستان دی آزدی وچ نگر دا حصا

اوداں تاں گلگت بلتستان دی ڈوگرےآں توں آزادی وچ سارے آزادی وچ سارے گلگت بلتستان دے لوکاں دا کردار اے پر نگر دا کیپٹن بابر خان اوہ پہلا شخص سی جیہنے ڈوگرےآں دے خلاف بغاوت شروع کیتی سی۔ فیر ایس توں علاوا نگر دا ای کرنل احسان علی خان وی شامل ہو گیا جیہڑا کہگلگت بلتستان دا پہلا کمیشنڈ آفیسر سی۔ کرنل مرزا حسن خان دا تعلق وی نگر نال سی ۔ فیر جد گلگت بلتستان دے ظالم میراں دے خلاف بغاوت ہوئی تاں اوہ وی نگر توں ای شروع ہوئی سی۔