ذوالفقار علی بھٹو
| ذولفقار علی بھٹو | |
| |
| ذوالفقار علی بھٹو | |
| جمیا: | 5 جنوری 1928 لاڑکانہ برطانوی ہندستان |
| مریا: | 4 اپریل 1979 راولپنڈی پاکستان |
| صدر پاکستان : | 20 دسمبر 1971 - 13 اگست 1973 چوتھا صدر |
| وزیراعظم پاکستان: | 14 اگست 1973 - 5 جولائی 1977 |
| وزیرخارجہ پاکستان: | 15 جون 1963 - 12 جون 1966 |
| 20 دسمبر 1971 - 28 مارچ 1977 | |
| پارٹی: | پاکستان پیپلز پارٹی |
ذوالفقار علی بھٹو پاکستانی سیاستدان سی جیہڑا 1971 توں 1973 تک پاکستان دا صدر تے 1973 توں1977 تک پاکستان دا وزیر اعظم رہیا۔ اوہدا جوڑ پاکستان پیپلز پارٹی نال سی۔ ذوالفقار علی بھٹو سند دے اک وڈے جگیردار دا پتر سی۔ امریکہ تے برطانیہ توں پڑھن مگروں پاکستان چ ڈکٹیٹر جنرل ایوب خان نال رل گیا تے اوہدی پارٹی کنونشنل مسلم لیگ دا کنوینر بن گیا تے ایوب خان دی سرکار چ وزیر رہیا۔ فاطمہ جناح دے خلاف چناؤ چ ایوب خان نال سی۔ 10 ورے تک ایوب خان نال رہن دے مگروں بھٹو اوہدے خلاف ہوگیا۔ پاکستان پیپلز پارٹی دی نیوں رکھی۔ سوشلزم تے غریباں دا نعرہ لا کے 1970 دیاں چوناں لہندے پاکستان چ جت کے لہندے پاکستان دا صدر تے فیر وزیر اعظم بن گیا۔ جرنل ضیا نے اوہنوں پھانسی دے دتی۔
ذوالفقار علی بھٹو خورشید بیگم تے سر شاہنواز بھٹو دا پتر سی۔ اوہ 5 جنوری 1928 نوں لاڑکانہ سند چ جمیا۔ اوہ اپنے ماں پیو دا تیجا پتر سی۔ اودا پیو سر شاہنواز بھٹو ریاست جوناگڑھ دا وزیر اعظم سی۔ 1943 چ اودا ویاہ شیریں امیر بیگم نال ہویا جیہڑا تھوڑے چر مگروں ٹٹ گیا۔ 1947 چ بھٹو نے یونیورسٹی آف ساؤتھرن کیلیفورنیا چ داخلہ لیا۔ 1949 چ اوہ کیلیفورنیایونیورسٹی، برکلے امریکہ ول ٹر گیا۔ ایتھوں پولیٹیکل سائنس چ ڈگری لین مکروں تے قنون دی پڑھائی لئی 1950 چ اوہ کرائسٹ چرچ کالج، آکسفورڈ برطانیہ گیا۔ 1953 چ پڑھائی پوری ہوگی۔ 8 ستمبر 1951 نوں اک ایرانی زنانی نصرت بھٹو نال اونے کراچی چ ویاہ کیتا۔ کراچی آ کے بھٹو سند مسلم کالج چ پڑھان لگ گیا۔ تس اپنے پیو دے مرن مگروں اپنی زمین جائیداد نون وی سمبالن لگ پیا۔
سیاست چ
سودھو1957 چ یونائیٹڈ نیشنز جان والے لوکاں چ بھٹو وی شامل سی۔ 1958 چ پاکستان چ جنرل ایوب خان نے مارشل لا لا دتا تے بھٹو نے جمہوریت دا سنگ نبھان دے بجاۓ مارشل لا نال رل گیا۔ ایوب خان نے ذوالفقار علی بھٹو نوں انرجی کامرس انفارمیشن تے انڈسٹری دا وزیر بنا دتا۔ جوان تے ناتجربہکار لون دے باوجود بھٹو ایب خان دے نیڑے تے سیاست چ اوپر ہوندا گیا۔ 1960 چ اوہنے ہندستان نال پانی دا ایگری منٹ کیتا۔ ذوالفقار علی بھٹو نے ایوب دی کنونشنل مسلم لیگ نوں چلایا۔
1962 چ ذوالفقار علی بھٹو نوں پاکستان دا وزیر خارجہ بنا دتا گیا۔ وزیرخارجہ بنن مگروں بھٹو نے امریکہ ول ہوئی پالیسی نوں پلٹیا تے پاکستان دے ساک چین نال جوڑے۔ 1963 چ چین نال ولگن تے معاہدہ کیتا تے چین نوں 750 مربع کلومیٹر تھاں دے دتا۔ بھٹو نے اسلامی دیساں نال وی ساک گوڑھے کیتے۔ 1965 دی لڑائی مگروں جون 1966 چ بھٹو نے وزارت چھڈ دتی۔
30اوہنے نومبر 1967 نوں لہور چ پاکستان پیپلز پارٹی دی نیوں رکھی۔ ایہ پارٹی اسلام لوک راج سوشلزم دیاں نیوآں تے بنی۔ 1970 دے چناؤ چ لہندے پاکستان چ پاکستان پیپلز پارٹی جت گئی تے چڑھدے پاکستان چ عوامی لیگ چناؤ جت گئی۔ راج عوامی لیگ نوں مِلنا چاہیدا سی۔ بھٹو دا نعرہ لوک راج سی پر اوہنے عوامی لیگ دے شیخ مجیب نوں راج ناں دتا۔ چڑدے پاکستان دے وکھرے ہون توں مگروں 1971 نوں ذوالفقار علی بھٹو پاکستان دا صدر بنا دتا جاندا اے۔ راج چ آن مگروں بھٹو نے جگیردارون نوں اگے لے کے آیا۔ ووٹ اونے عریباں کولوں لۓ سن سند تے پنجاب چ پر ایتھے اونے راج دو جگیرداراں ممتاز بھٹو تے غلام مصطفا کھر نوں دتا۔ فیڈرل سیکورٹی فورس دے ناں تے اپنی اک وکھری فوج بنائی جینے اودے ویریاں نوں رج کے تنگ کیتا۔ جرنل ضیا نے مارشل لا لا کے راج تے مل مار لیا تے ذوالفقار علی بھٹو نوں پھانسی دے دتی۔
باہرلے جوڑ
سودھو
صدر پاکستان