آنند کارج

اک جوڑا لاواں لیندا ہویا

آنند کارج سکھ ویاہ دی ریت اے۔ اس دا اکھری مطلب اے، خوشی بھریا کم۔ انندُو سکھاں دے تیجے گرو، گرو امر داس دا کلام اے جو اوہنا رامکلی راگ تحت رچیا۔ ایہہ گرو گرنتھ صاحب وچ پنہ 773 اتے درج اے۔ بعد وچ چوتھے گرو، گرو رام داس نے چار لاواں دی رچنا کیتی۔ سکھ ویاہ ویلے اس رچنا دا پاٹھ ہندا اے اتے لاواں دے پاٹھ ویلے ویاہ والا جوڑا (منڈا اتے کڑی) گرو گرنتھ صاحب نوں سجے ہتھ رکھدے ہوئے اس دی پرکرما کردا اے۔ اس طرحاں چار وار پرکرما کیتی جاندی اے۔

1909 وچ برطانوی ہند وچ آنند کارج ایکٹ پاس ہویا پر آزادی توں بعد پاکستان وچ آنند کارج ایکٹ 2007 وچ پاس ہویا جس دے تحت دنیا دے کسے وی کونے چوں سکھ اپنا ویاہ رجسٹر کر سکدے ہن۔ دنیا دے وکھ-وکھ دیساں وچوں سکھاں نے اپنے ویاہ اس دے تحت رجسٹر وی کیتے ہن۔ پاکستان سرکار اتے پاکستان گردوارہ پربندھک کمیٹی رجسٹریشن لئی سرٹیفکیٹ جاری کردی اے۔ بھارت وچ ایہہ ایکٹ آزادی توں بعد وی لاگوُ رہا اتے حال ہی وچ اس وچ سدھار کر کے ایہہ ایکٹ پاس ہویا پر کجھ کمیاں باقی ہن۔

انند میرج ایکٹ دا اتہاس

آنند کارج تحت ہوئے ویاہ نوں قانونی مانتا دواؤن لئی سبھ توں پہلاں خیال ریاست نابھہ دے ٹکا رپودمن سنگھ نوں آیا جو وائسرائے دی کونسل دے سکھ میمبر سن۔ سنگھ نے سکھ جتھیبندیاں اتے بھائی کانھ سنگھ نابھہ آدی ودواناں دی رائے لین توں بعد 30 اکتوبر 1908 نوں اس متعلق بلّ کونسل وچ پیش کیتا۔ اس بلّ دا کجھ ہندو دھرم ول جھکاء والے سکھاں ولوں خلاف وی کیتا گیا جناں وچ مہاراجہ نابھہ، ہیرا سنگھ وی شامل سن۔ بعد وچ کونسل دے ایڈیشنل میمبر سردار سندر سنگھ مجیٹھیا نے 27 اگست 1909 نوں ایہہ بل شملہ وکھے وائسرائے دی کونسل وچ پیش کیتا اتے کونسل نے اسنوں سلیکٹ کمیٹی دے سپرد کر دتا۔ 10 ستمبر نوں کمیٹی دی رپوٹ کونسل وچ پیش ہوئی اتے ودھ گنتی وچ حمایت دے چلدے 22 اکتوبر 1909 نوں ایہہ بلّ پاس ہو گیا اتے سارے برطانوی ہند ، جس وچ موجودہ بھارت پاکستان اتے بنگلہ دیش وی شامل سن، تے لاگوُ ہویا۔

ایہہ وی ویکھو

• مول منتر

حوالے