سائنسی قیامت
سورج سمیت سارے تارےآں چ موجود مادہ دی مقدار دا وڈا حصہ ہائیڈروجن تے مشتمل اے ۔ ہائیڈروجن دے مسلسل خودکار ایٹمی دھماکےآں نال بوہت زیادہ روشنی تے حرارت نکلدی اے جس نال سورج چمکدا نظر آندا اے ۔ ایٹمی دھماکےآں دا ایہہ عمل ہائیڈروجن نوں ہیلیئم چ تبدیل کردا چلا جاندا اے ۔ ساڈے سورج چ حالے اینا ایندھن موجود اے کہ اوہ ہور ساڈھے 4 ارب سال روشن رہ سکدا اے ۔
جدوں ساڈے سورج دے مرکز چ موجود 10 فیصد ہائیڈروجن نیوکلیئر فیوژن دے عمل توں لنگھ کے ہیلیئم چ تبدیل ہو جائے گی تے سورج دا مرکز اپنے بے پناہ دباء دی وجہ توں ہور سکڑ جائے گا تے اسدا درجہ حرارت بے پناہ حد تک ودھ جائے گا ۔ اینج ہون نال ہیلئم وی جلنا شروع ہو جائے گئی جس نال کاربن پیدا ہو کے سورج دے مرکز چ جمع ہون لگے گی ۔ ہائیڈروجن تے ہیلیئم دے جلن دا ایہہ دوہرا عمل سورج چ بوہت ودھ حرارت پیدا کر دے گا جس نال زوردار دھماکےآں نال سورج دی باہرلی سطح پھل جائے تے اس دے مگروں پھلی ہوئی سطح دا درجہ حرارت وی نسبتا گھٹ ہو جائے گا ۔
کسے وی ستارے دا پھل کے اپنی اصلی جسامت توں کئی گنا ودھ جان نوں فلکیاتی سائنس دی اصطلاح چ لال دیو (سرخ ضخام)(red gaint) دا ناں دتا جاندا اے ۔ ساڈا سورج جدوں لال دیو چ تبدیل ہوئے گا تے اوہ پھل کے نا صرف عطارد بلکہ زہرہ دے مدار تک آ پہنچے گا ۔ جس نال دونے قریبی سیارے لا محالہ سورج چ ڈگ کے اسدی کمیت دا حصہ بن جان گے ۔ زمین زیادہ فاصلہ ہون پاروں سورج چ ڈگن توں تاں بچ جائے گئی ، پر سورج دا پھل کے زمین دے اینا نیڑے آ جانا زمین دے درجہ حرارت نوں اینا ودھا دے گا ، جس نال کرہ ارض تے واقع کروڑاں ارباں قسماں دا جنتو جیون جھلس کے تباہ ہو جائے گا تے ہر پاسے قیامت چھا جائے گی ۔
اینہاں سائنسی حقیقتاں دی روشنی چ ظاہر ہندا اے کہ زمین تے قیامت گھٹو گھٹ ساڈھے 4 ارب ورہے بعد آئے گی ۔ پر ایہہ وی حقیقت اے کہ کئی سائنسی اندازے غلط وی ثابت ہو چکے نیں تے کئی بدلے وی جا چکے نیں ۔
سورج دا پھل کے زمین دےاینا نیڑے چلے آن نال زمین تے قیامت برپا ہون دے بارے چ تاجدار کائنات صلی اللہ علیہ و آلیہ و سلم توں بوہت ساریاں حدیثاں مروی نیں ۔ نبی آخرالزمان صلی اللہ علیہ و الیہ و سلم نے فرمائیا :
تدني الشمس یوم القیامۃ من الخلق ۔ ( صحیح مسلم جلد:2 صفحہ 384)
بولی وٹاندرا : قیامت دے دیہاڑ سورج محلوق دے انتہائی کول آن پہنچے گا ۔