حمیدہ وحید الدین

حمیدہ وحید الدین
Hameeda Waheeduddin
جاپانی ناں :	ہینکو سمیدا (Hanako Sumida)
جنمستھان :	اوساکا، جاپان
جمݨ تریخ :	4 جنوری 1976
کَم :	سیاست دان
تعلیم :	بیچلر آف سائنس
مادر علمی :	لہور کالج فار ویمن یونیورسٹی

حمیدہ وحید الدین، اک پاکستانی سیاست دان نیں ۔ اوہ مِمبر پنجاب اسمبلی تے سابقہ صوبائی وزیر نیں ۔

مُڈھلا جیون

حمیدہ 4 جنوری 1976ء نوں جاپان دے شہر اوساکا وچ اک جاپانی ماں تے پنجابی والد دے ہاں پیدا ہوئیاں ۔

تعلیم

اوہناں نے مُڈھلی تعلیم جاپان توں حاصل کیتی ۔ پاکستان منتقل ہوݨ توں بعد اوہناں نے 6 مہینے اردو سِکھی تے میٹرک دی تعلیم پنجاب وچ مکمل کیتی ۔ اوہناں نے لہور کالج فار ویمن یونیورسٹی توں 1998 وچ بیچلر آف سائنس دی ڈِگری حاصل کیتی ۔

سیاسی کیریئر

حمیدہ 2002ء دے پاکستانی عام انتخابات وچ پنجاب اسمبلی دے حلقا 116 (منڈی بہاؤدین 1) توں مسلم لیگ ق دی امیدوار دے طور تے پنجاب اسمبلی دی مِمبر مُنتخِب ہوگئیاں ۔ اوہناں نے 33،122 ووٹ حاصل کیتے ۔ اوہناں نے مِمبر پنجاب اسمبلی دی حیثیت نال 2003ء توں 2007ء تک پارلیمانی سکریٹری برائے خواندگی تےغیر رسمی مُڈھلی تعلیم دے فرائض انجام دِتے ۔

اوہناں نے 2008ء دے پاکستانی عام انتخابات وچ پنجاب اسمبلی دے حلقا 116 (منڈی بہاؤدین 1) توں مسلم لیگ ق دی امیدوار دی حیثیت نال الیکشن لڑیا پَر اوہ ہار گئیاں ۔

اوہ 2013ء دے پاکستانی عام انتخابات وچ پنجاب اسمبلی دے حلقا 116 (منڈی بہاؤدین 1) توں مسلم لیگ ن دی امیدوار دے طور تے پنجاب اسمبلی دی مِمبر مُنتخِب ہوگئیاں ۔ جون 2013ء وچ اوہناں نوں وزیر اعلا پنجاب شہباز شریف دی صوبائی کبینا وچ بطور وزیر برائے سواݨیاں دی ترقی شامل کیتا گیا ۔

اوہ 2018ء دے پاکستانی عام انتخابات وچ پنجاب اسمبلی دے حلقا 65 (منڈی بہاؤدین 1) توں مسلم لیگ ن دی امیدوار دے طور تے اک واری فیر پنجاب اسمبلی دی مِمبر مُنتخِب ہوگئیاں ۔