نوریا
نوریا (عربی: ناعورة، جمع: نواعیر) آبی توانائی ناݪ چلݨ واݪا سکوپ وِیل اے جو پاݨی نوں چھوٹے آبی ناݪے وچ چکّݨ لئی اِستعمال کیتا جان٘دا اے، جیہدا مقصد آبپاشی یا شہراں تے دیہاتّاں نوں پاݨی فراہم کرنا ہوسکدا اے۔
نوریا رہٹ دے اصول اُتّے کم کردا اے۔ رہٹ نوں چلاؤݨ لئی جانوراں دی مدد لئی جان٘دی اے پَر نوریا نوں نہر، ندی یا دریا دے وَگدے پاݨی دی طاقت ناݪ چلایا جان٘دا اے۔
نوریا دی اِصطلاح عام طور تے اوہناں آلات لئی اِستعمال کیتی جان٘دی اے جو پہیئّے نوں گھماؤݨ لئی پاݨی دی حرکت دی طاقت دا اِستعمال کردے نیں۔ جانوراں دی مدد ناݪ چلّݨ واݪے آلات نوں رہٹ کہیا جان٘دا اے۔ اسے طرحاں دے دیگر آلات نوں چین پمپ دے نام توں گروپ کیتا گیا اے۔
نوریا دریا دے بہاؤ توں حاصل ہوݨ واݪی توانائی دا اِستعمال کردے ہوئے پاݨی نوں تھللی سطح توں بلن٘دی اُتے مُنتقل کرن دا کَم انجام دین٘دا اے۔ ایہ اک وڈے، تَن٘گ ان٘ڈر شاٹ واٹر وِیل اُتّے مُشتمل ہُن٘دا اے جیہدا کنارا کنٹینرز یا کمپارٹمنٹس دی اک سیریز ناݪ بݨیا ہُن٘دا اے جو دریا توں پاݨی نوں پہیئّے دے اُتلے حِصّے وچ لے جان٘دے نیں۔ ایہدا تصوّر جدِید ہائیڈرولک رام (Hydraulic ram) ناݪ مِݪدا جݪدا اے، جو وَگدے ہوئے پاݨی دی طاقت نوں وی دریا توں باہر کڈّھݨ لئی ورتدا اے۔
واٹر مِلز وچ پائے جاݨ واݪے پاݨی دے پہیئّیاں دے برعکس، نوریا کِسے دوسرے عمل نوں مکینیکل طاقت فراہم نئیں کَردا۔
.jpg)
