سونمیانی

سونمیانی
Sonmiani
مُلک :	پاکستان
صوبہ :	بلوچستان
ضلع :	حَب
آبادی :
بولیاں :	لاسی، اردو

سونمیانی (Sonmiani)، پاکستان دے ضلع حب وچ اک ساحلی قصبہ اے جو کراچی توں تقریبن 45 کلومیٹر شمال مغرب وچ واقع اے۔ سونمیانی دا ساحل بحیرہ عرب دا اِنتہائی شمالی نقطہ اے۔ سونمیانی بیچ کراچی دے کوݪ اہم ساحلاں وِچوں اک اے۔ ایہ قصبہ تحصیل سونمیانی دا انتظامی مرکز وی اے۔ سونمیانی خلائی تحقیق تے ترقی لئی مشہور اے۔ ایتھے اک خلائی مرکز/اسپیس پورٹ اے، جیہنوں سونمیانی اسپیس پورٹ کہیا جاندا اے۔ پاکستان اکنامک کوآرڈینیشن کمیشن نے ایتھے مائع قدرتی گیس دے ٹرمینل دی تعمیر دے منصوبے دا اعلان کیتا اے۔

تاریخ

انگریزاں توں پہلاں پورے وسط ایشیا وچ ایہدا شہرہ سی۔ ایتھوں بڑیاں بڑیاں بادبانی کشتیاں ہندوستان، عرب، افریقا تے خلیج فارس دیاں بندرگاہواں تک جاندیاں اوندیاں سی ۔ 19 ویں صدی دے آغاز تک بلخ تے بخارا دا تجارتی مال کارواں دے ذریعے اس بندرگاہ تے اوندا سی۔

1805ء وچ پرتگال دے سمندری قزاقاں نے ایہ بندرگاہ لُٹ کے ایہنوں اگ لا دتی۔ برطانوی تسلط توں بعد اس بندرگاہ دی اہمیت ختم ہو گئی۔ انگریزاں نے کراچی دی بندرگاہ نوں جدید بنیاداں تے ترقی دتی تے ریل دے ذریعے ملک دے بڑے بڑے شہراں نال ملا دتا۔ اس توں علاوا ہندوستان دیاں سرحداں دا تعین ہویا۔ جیہدے نال کارواں دی آوا جاوی رک گئی۔ ایہدے نتیجے وچ بندرگاہ ہولی ہولی اُجڑ گئی۔ اج کل سونمیاݨی مچھیرےآں لئی مشہور اے۔ ایتھے بڑے بحری جہاز لنگر انداز نئیں ہوسکدے کیونکہ ساحل دے نزدیک پاݨی دی ڈونگھ کعھٹ اے۔ قدیم باسیاں دے مطابق ماضی وچ اس جزیرے تے مچھلی دے شکار توں واپس اوݨ والے ماہی گیر آرام دی غرض نال قیام کر دے سی۔

قدرتی ماحول

کراچی توں لگ بھگ 80 کلومیٹر دی دوری تے واقع سونمیاݨی دے نیڑے جزیرہ چاروں پاسےوں نیلگوں سمندر تے اک پاسےوں لق ودق صحراء ناݪ منسلک اے جیہڑا بہت خوبصورت امتزاج دا نمونہ دِکھدا اے۔

جزیرے دے عین اُتے ڈونگھے پاݨی چوں اپݨے شکار نوں اچکݨ لئی فضاواں وچ محو پرواز شور مچوندے چِٹے براق پکھیرو تے تھلے ساحل تے دوڑدے پعھجدے چِٹے تے زردی مائل کیکڑے، وقفے وقفے نال سمندری پدھر اُتے ابھردیاں شرارتی وہیل شارک مچھلیاں دے غوطے ماحول نوں سحرزدہ کر دیندے نیں۔