روبی سہوتا

روبی سہوتا
Ruby Sahota
مِمبر کینیڈیئن پارلیمینٹ
ناں :	روبی سنگھ سہوتا
قوم :	پنجابی
ذات :	جٹ
جنمستھان :	ٹورانٹو، انٹاریو، کینیڈا
جمݨ تریخ :	22 جون
سیاسی جماعت :	لِبرل پارٹی آف کینیڈا
پیشا :	وکیل، بیرسٹر
رہائش :	بریمپٹن
جیون ساتھی :	تیجِندر سہوتا
نیاݨے :	1 ، نہال
مادر علمی :	مکماسٹر یونیورسٹی، ویسٹرن مِشیگن یونیورسٹی کولی لاء سکول
ویب سائیٹ :	rsahota.liberal.ca

روبی سنگھ سہوتا (انگریزی : Ruby Sahota) اک پنجابی کینیڈیئن، کینیڈیئن مِمبر پارلیمنٹ، لِبرل سیاست دان نیں۔ اوہ 2015، 2019 تے 2021 دے وفاقی انتخابات وچ بریمپٹن نارتھ دے حلقے توں کینیڈا دے ہاؤس آف کامنز دی مِمبر پارلیمنٹ منتخب ہوئیاں سی۔

مُڈھلا جیون تے تعلیم

1970 دے دہاکے دے آخر وچ روبی سہوتا دے ماپےآں دے کینیڈا پہنچݨ مگروں روبی دی پیدائش ٹورانٹو وچ ہوئی سی۔ اوہناں دی پرورش بریمپٹن وچ ہوئی۔ اوہناں دے والد پہلاں انٹاریو سکھ اینڈ گردوارا کونسل دے چیئرمین سی۔

روبی سہوتا نے 1993 توں 1998 دے دوران بریمپٹن دے سینٹرل پیل سیکنڈری سکول وچ تعلیم حاصل کیتی تے فیر 2003 وچ مکماسٹر یونیورسٹی توں پولیٹیکل سائنس اینڈ پیس اسٹڈیز وچ آنرز دی بیچلر ڈگری حاصل کیتی۔ اس توں بعد اوہناں نے ویسٹرن مِشی گن یونیورسٹی کولی لاء اسکول توں تعلیم حاصل کیتی، 2007 وچ گریجوئیشن کیتا۔

قنونی کیریئر

روبی سہوتا نے 2007 توں 2012 تک کلیڡ لینڈ اوہائیو وچ تجارتی قنونی چارا جوئی اُتے مرکوز لاء پریکٹس کیتی ۔

سیاسی کیریئر

روبی سہوتا 1 مارچ 2015 نوں بریمپٹن نارتھ دے نویں تخلیق شدہ حلقے توں لِبرل پارٹی آف کینیڈا ولوں نامزد ہوئیاں۔ روبی نے 23297 ووٹ لے کے کامیابی حاصل کیتی تے کنزرویٹِو پارٹی دے پرم گِل نوں شکست دِتی۔ مِمبر پارلیمینٹ مُنتخب ہوݨ مگروں روبی، قائما کمیٹی برائے سواݨیاں دی حیثیئت تے قائما کمیٹی برائے کارروائی تے پارلیمینٹری امور لئی تعینات ہوئیاں۔ اس توں بعد اوہناں نوں انتخابی اصلاحات دی خصوصی کمیٹی وچ نامزد کیتا گیا۔ اوہ 1 فروری 2017 نوں اپݨے ساتھیاں ولوں فیڈرل لبرل اونٹاریو کاکس دی چیئرپرسن مُنتخب ہوگئیاں۔ کاکس چیئر دی حیثیئت نال اوہ اجلاساں دی صدارت تے تبادلہ خیال دی قیادت کردیاں رہیاں تے انٹاریو دے لِبرل مِمبران پارلیمنٹ تے وزیر اعظم دے دفتر تے کبینا دے درمیان اک اہم ربط دے طور تے کَم کردیاں نیں۔ روبی سہوتا دوبارا 2019 تے 2021 دے وفاقی انتخابات وچ بریمپٹن نارتھ دے حلقے توں کینیڈا دے ہاؤس آف کامنز دی ممبر پارلیمنٹ منتخب ہوئیاں۔

نِجی جیون

روبی سہوتا نے پڈائیٹرسٹ ڈاکٹر تیجندر سہوتا نال بیاہ کیتا تے اوہناں دا اک پُتر اے جیہدا نام نہال اے۔