تخت طاؤس
مغلیہ سلطنت دے شہنشاہ شاہجہان نے اپنی تخت نشینی مگروں اپنے لئی اک بوہت قیمتی تخت بنوائیا جس نوں تحت طاؤس آکھئیا جاندا اے ۔ اس تخت دی لمبائی 13 گز تے چوڑائی ڈھائی گز سی ۔ ایہہ تخت 6 پاوےآں تے قائم سی جہڑے خالص سونے دے سن ۔ تخت تے چڑھن لئی 3 نکے نکے پوڈے بنائے گئے سن جنہاں چ قیمتی ہیرے لگے ہوئے سن ۔ تخت دے دوناں پاسے 2 خوبصورت مور اپنیاں چنجاں چ موتیاں دی لڑی لئی پراں نوں کھولے کھڑے بنائے گئے سن اینہاں دے سینےآں تے لال یاقوت لائے ہوئے سن ۔ پچھلی تحتی تے وی قیمتی ہیرے لگے ہوئے سن ، جنہاں دی قیمت لکھاں روپیئے سی ۔ اس تخت دی تیاری تے اک کروڑ روپیہ خرچ ہوئیا سی ۔ جدوں نادر شاہ افشار نے دلی تے حملہ کیتا تے اوہ دلی دی ساری دولت دے علاوہ تخت طاؤس وی اپنے نال ایران لے گئیا ۔
