بھتا ویلا

بھتا ویلا، پنجابی رہتل وچ ویلے دی اک ونڈ اے تے دن رات دے اَٹھ پہراں وِچوں اک پہر اے۔ بھتا ویلا دوپہر 12:00 بجے توں دوپہر 3:00 بجے تک دا ٹائم اے۔ بھتے ویلے نوں پیشی ویلا وی کہیا جاندا اے۔

بھتّا اُبݪے چوݪاں نوں کہیا جاندا اے۔ عام طور تے بھتّے دا مطلب کسان دا دوپہر دا کھاݨا اے۔ بھتّا نوکر چاکر نوں مِتّھی ہوئی اُجرت توں اَڈّ دِتّے جاݨ واݪے اچیچ الاؤنس نوں وی کہیا جاندا اے۔ بھتّا غُنڈا ٹیکس نوں وی کہیا جاندا اے۔

اُباݪے ہوئے چوݪاں تے جدوں دُدّھ گھت دئیے تاں اوہ بھتّ بݨ جاندا اے۔ بھتّ کھیر نوں وی کہیا جاندا اے جیہڑی دُدّھ تے چوݪاں نوں رِنّھ کے بݨائی جاندی اے۔ بعض تھانواں تے بیہی روٹی اُتے گُڑ دے ردّھے نوں وی بَھتّ سدّیا جاندا اے۔ بھتّ کھاݨ دا ویلا دوپہر دا اے۔ بھتّے نوں بھتّ یا بھات وی کہندے نیں۔

وارث شاہ جی بھتّے بارے ایداں دسّ پاؤندے نیں :

ہِــیر چـائی بھــتّا، کَھــن٘ڈ، کِھــیر، مکّھــݨ

مہیں رانجھے دے پاس لَے دھاؤندی اے