وساکھی

بساکھی پنجاب دا اک ثقافتی تہوار اے۔ شبد بساکھی بساکھ توں بݨیا اے۔ پنجاب دے لوک کݨکاں دی واڈھی تے نویں پنجابی سال دیاں خُشیاں مناوندے نیں۔ ۔ ایہ خریف دی فصل دے پکݨ دی خُشی دا نشان اے۔ بساکھ پنجابی سال دا پہلا مہینا اے۔

بساکھی دی پنجاب دی تریخ تے پنجابی ثقافت چ خاص اہمیت اے۔ پنجاب (پاکستان) چ ایہنوں ہر مذہب دے پنجابی لوک مناوندے نیں۔ چڑھدے پنجاب چ کچھ مکتبہ فکر ایہنوں اپݨے سِکھ دھرم نال جوڑݨ دی کوشش کر دے نیں۔ سِکھ مذہب 1699ء وچ بݨایا گیا تے پنجاب چ کݨک دی واہی بیجی ہزاراں سالاں توں کیتی جا رہی اے۔ کݨک دے آثار ہڑپا رہتل چوں وی دریافت ہوئے نیں۔ پنجاب دے ہزاراں سال پراݨے ثقافتی تہوار بساکھی دی سکھ مت نال تریخی طور تے کوئی جڑت نئیں۔ پنجاب (پاکستان) دے لوک اپݨی پنجابی ثقافت دے تہوار بساکھی نوں بھر پور طریقے نال مناوندے نیں جیہدا اوہناں دی پنجابی رہتل چ اک خاص مقام اے۔

وساکھی نوں پنجاب دے نویں سال دا پہلا دن وی آکھیا جاندا اے، جیویں ایران وچ نوروز اتے یورپ وچ نیو ائیر نویں سال دی شروعات ہوندے نے بالکل ایوں وساکھی پنجاب دے نویں سال دا پہلا دن ہوندا اے۔ شبد وساکھی ،وساکھ توں اے جیہڑا بکرمی کلینڈر دا پہلا مہینہ اے ۔ وساکھی میلے نوں سکھ دھرم وچ کس کارن ایڈی مہاتتا دتی جاندی اے ایس تے وی اک نظر کرنے آں۔سکھ دھرم دے بوہت سارے واقعے ایس دے نال جڑے ہوئے نیں۔ سکھ دھرم دے نویں سال دی شروعات اتے خالصہ یُگ دی یاد منان دا وی دن ہوندا اے جدوں 1699 وچ دسویں گرو، گرو گوبند سنگھ جی ہوراں نے وساکھی دیہاڑے سکھاں نوں سینک سنتاں دے پریوار وچ بدل دتا جس دا ناں خالصہ پنتھ رکھیا گیا۔آکھیا جاندا اے کہ نوویں گرو، گرو تیغ بہادر جی نے جدوں اورنگزیب دی گل منن تو انکار کیتا تے اونہاں نوں سولی دے دتی گئی سی او وی دن وساکھی دا سی تے اوہی دیہاڑا سکھ کرماں دا جنم دن وی منیا جاندا اے کیونکہ دسویں گرو، گرو گوبند سنگھ جی دی تاجپوشی تے اتہاسک خالصہ پنتھ دی ستھاپنا دا وی ایہو دن اے ۔ جلیانوالہ باغ دی گھٹنا وی وساکھی دے دن ای ہوئی سی۔ ایس کر کے سکھ اتہاس وچ وساکھی نوں سکھ تیہوہاراں وچ ایک وڈے تیوہار دا مقام حاصل اے۔ وساکھی اونہاں تن ہندو تیوہاراں چو ں اک اے جس نوں تیجے گرو ، گرو امر داس جی نے سکھاں لئی چنیا سی۔

ایس ساری گل دا ایہ مطلب نئیں جے وساکھی سکھ دھرم دا ای تیوہار اے، صرف سکھ دھرم وچ وساکھی دی اہمیت بارے لکھیا اے۔ وساکھی پنجاب دا تیوہار اے جس داسمبندھ دھرتی نال اے نہ کے دھرم نال ، وساکھی نوں پنجاب واسی خریف دی فصل اترن دی خشی وچ مناندے نیں ،پنجابی رہتل وچ ایس دن دا اپنا ای اک مقام اے۔ جدوں تک کنکا واہیاں ،بیجیاں تے چکیاں جاندیاں رہن گیاں پنجاب دے زندہ دل واسی وساکھی مناندے رہن گے۔