بال ادب
بال ادب، ادب دی اوہ ونگی اے جس دی رچنا بالّاں نوں مدِّنظر وچ رکھ کے کیتی جاندی اے۔ دوجے لفظاں وچ کیہا جا سکدا اے کہ بالّاں لئی لکھیا جاݨ والا ادب، بال ادب اے۔
بال ادب دا مقصد سودھو
دنیا پدھر تے نفسیات دان، تعلیمی ماہر تے ودواناں نے ایہہ وچار نکھاریا اے کہ بچے دی ہمہ جہت شخصیت نوں اسارن وچ ماں بولی تے اس وچ رچیا ادب اہم کردار نبھاؤندے نیں۔ اس نظریے ناݪ ہر بولی وچ بال ادب نوں بڑھاوا دینا لازمی ہو جاندا اے۔ انج بچےآں نوں مُڈھلی حالت، یعنی بچپن وچ ہی چنگیاں تے معیاری، عمر مطابق لوڑیندیاں من پسند بال کتاباں ناݪ جوڑیا جاوے۔ بچے دیاں جسمانی، ذہنی، بھاوک تے ماحولیاتی لوڑاں مطابق بال ادب سرجن دی ضرورت اے۔ لکھاری نوں بچے دی اَکھ ناݪ دیکھن دی لوڑ اے۔ اوہ کِداں دیکھدا تے کِداں سوچدا اے، ایہ چتون دی لوڑ اے۔ اس دی تکنی نوں نیانی نہ سمجھدے ہوئے، اس دی قدر کیتی جاوے۔
بال ادب دا موضُوع سودھو
جتھوں تک موضوعاں دا تعلق اے، اس لئی وڈا کھیتر پیا اے۔ بچے دی پڑھن رچی نوں ترپت کرن لئی ہر موضوع نال متعلق کتاباں لکھن دی لوڑ اے۔ بچے نوں تاں ترقی دے ہر پڑاؤ تے سوجھی نوں وڈا تے سہرد بناؤن والا تے اس دی سوجھ نوں سخت کرن والا ساہت چاہیدا اے۔ اس لئی ماں-بولی توں ودھ ہور کوئی طاقتور ذِریعہ نہیں۔
بال ادب دے رُوپ سودھو
بال ادب دے رُوپ لوریاں، بجھارتاں، چٹکلے، شاعری، گیت، شعری کہانیاں، کہانیاں، اکانگی، بال ناٹک، ناول، سنسمرن، سفرنامہ، جیونی، گل بات، علم تے سائنس، کِنیاں ہی صنفاں وچ لکھیا جا سکدا اے۔
بالّاں دیاں کتابّاں کیہو جہیاں ہون سودھو
بال ادب کتاب عمر طبقہ مطابق رنگدار، سچتر، سُندر چھپائی، ودھیا کاغذ تے چنگی جلد بندی واݪی ہونی ضروری اے۔ موضوع دے مطابق کتاب دا سائز، صفحے تے ڈھکویں مصورّی دی وڈی اہمیت اے۔ چترکار نوں وی بال نفسیات دا علم ہونا چاہیدا اے کہ اوہ کس عمر لئی تے کس موضوع نوں چتر رہیا اے۔
پنجابی بال ادب سودھو
تفصیلی لی لئی ویکھو: پنجابی بال ادب
پنجابی زبان وچ بال ادب واسطے بہت کم ہویا اے۔ لہندے پنجاب وچ پنجابی بال ادبی بورڈ وی اس سِلسلے وچ اہم کردار ادا کردا اے۔ پنجابی بال ادبی بورڈ دا مہینا وار رسالے پکھیرو دا پنجابی بال ادب واسطے بہت وڈا نام اے۔
پنجابی بال ادیب سودھو
پنجابی بال ادب وچ جوگدان پاؤن واݪیاں وچ صوفی غلام مصطفا تبسم، گربخش سنگھ پریتلڑی ، گردیال سنگھ، من موہن سنگھ داؤں، جسبیر بھلر، درشن سنگھ آشٹھ وغیرہ دے ناں ذِکر جوگ نیں۔
پنجابی بال ادب نوں درپیش چیلنجز سودھو
لگ بھگ پِچھلے دو دہاکیاں توں پنجابی بال ادب دی گھاٹ تے اہمیت نوں گمبھیرتا ناݪ محسوس کیتا جا رہیا اے۔ ایہ وی منیا گیا اے کہ پروڑ پاٹھکاں دے ادب ناݪوں بچیاں لئی لکھنا اوکھا اے۔