پکھیرو (رسالہ)
| اڈیٹر | اشرف سہیل |
|---|---|
| کیٹیگری | بال ادب رسالہ |
| آورتی | مہیناوار |
| Year founded | 1995 |
| کمپنی | پنجابی بال ادبی بورڈ |
| دیس | پنجاب، پاکستان |
| بنیاد | لہور |
| بولی | پنجابی |
پکھیرو (Pukheroo)، لہور، پنجاب، پاکستان توں پنجابی زبان وچ شائع ہون واݪا بال ادب رسالہ اے۔ ایہ پنجابی شاہ مکھی لِپی وچ چَھپدا اے۔ ایہدے وچ بالّاں لئی کہاݨیاں، ناول، نظماں، پہیلیاں، گیت تے لوریاں شامل نیں۔[۱][۲] ایہ پنجابی بال ادب دے ادارے پنجابی بال ادبی بورڈ، لہور دا پرچہ اے۔ ایس رسالے دے موڈھی تے موجودہ ایڈیٹر اشرف سہیل نیں تے معاونت کاراں وچ سہیل قیصر ہاشمی، اصغر سہیل، شاہد احمد راؤ، عبدالغفور خاں تے علی اکمل تصور شامل نیں۔[۳] اشرف سہیل ریلوے وِچ ملازمت کردے سن، اوس دوران اوہناں نے 1995ء وِچ پہلی واری پکھیرو دے نام توں بال پرچہ شروع کیتا۔ پرچے دی اشاعت 2005ء وچ عارضی طور تے رک گئی سی فیر پنجاب حکومت دے محکمہ ثقافت دے مݪ ورتݨ ناݪ ایہنوں بحال کر دِتا گیا۔ پرچہ ہُݨ تک مسلسل چَھپ رہیا اے۔
رسالے دے خاص نمبر وی شائع ہُندے نیں۔ کئی ایڈیشناں وچ سینکڑیاں صفحےآں دے "پکھیرو ناول نمبر" وی چھاپے جاندے نیں، جیہناں وچ جسبیر بُھلر، ڈاکٹر افتخار کھوکھر، علی اکمل تصور، ترسیم تے ایم وائی قیصر سمیت دیگر لکھاریاں دے ناول شامل نیں۔ اشرف سہیل نے "پکھیرو" لئی ہور زباناں دے بال ادب دا پنجابی وِچ ترجمہ وی کیتا اے۔ اشرف سہیل نے اردو بال ادب لئی لِکھن واݪے لکھاریاں نوں وی پنجابی بال ادب لئی لِکھن اُتے راضی کیتا، جیہناں وِچ علی اکمل تصور اک اہم نام نیں۔ علی اکمل تصور اردو رسالے آنکھ مچولی (کراچی)، تعلیم و تربیت، ماہنامہ پھول، نونہال توں علاوا ہور کئی رسالیاں وِچ لِکھ چُکے نیں۔ پکھیرو نوں چڑھدے پنجاب توں وی لکھاریاں تے مُورت کاراں دا ساتھ حاصل اے۔ مُورت کاری وچ جے ایس دیپ ولّوں تعاون کیتا جاندا اے۔
پکھیرو دے پڑھنہار پنجاب توں علاوہ امریکا، کینیڈا سمیت پوری دنیا وِچ کِھلرے ہوئے نیں۔[۴] ایہ پرچہ پنجابی بال ادب وِچ ایس ویلے شاہ مکھی پنجابی دا کلّا پرچہ اے۔
اتا پتا سودھو
- مہیناوار پکھیرو، 3\12 سٹریٹ، 64-B تنویرآباد، تاجپورا روڈ، مغلپورا، لاہور- 54840
- ای میل: pukheroo55@gmail.com
- رابطہ نمبر: 4224210-0300