ایپل
| ایپل | |
| |
| ٹائپ | کمپنی |
| بنی | 1 اپریل 1976 |
| نیو رکھن والا | سٹیو جابز،سٹیو وازنیاک |
| ہیڈکواٹر | کپرٹینو کیلیفورنیا |
| کاروباری تھاں | ساری دنیا |
ایپل امریکہ دی اک کمپنی اے جیہڑی الیکٹرانکس، کمپیوٹر سافٹویئر اَتے پرسنل کمپیوٹر بنا کے ویچدی اے۔ ایپل سارے جگ چ میکنٹوش، آئی پوڈ، آئی فون اَتے آئی پیڈ بنان والی کمپنی لئی جانی جاندی اے۔ ایہہ جگ دی سبھ توں وڈی ٹیکنالوجی دی کمپنی اے اَتے شیئر مارکیٹ آلِیاں کمپنیاں چ جگ دی سبھ توں وڈی کمپنی اے۔ ایپل دی 10 دیساں وچ 357 دکاناں نیں اَتے اک انٹرنیٹ تے دکان اے۔
تریخ
سودھواَیپل کمپنی دی نیہہ 1 اپریل، 1976 وچ کپرٹینو، کیلیفورنیا، امریکہ چ سٹیو جابز، سٹیو وازنیاک تے رونالڈ وین نے پاٸی سی۔ ایپل کمپنی نے اپنا پہلا کمپیوٹر ایپل I مارکیٹ وچ وِکن لئی 11 اپریل 1976 نوں رکھیا۔ ایہنوں سٹیو وازنیاک نے اپنے ہتھ نال بݨایا سی۔ ایپل 3 جنوری 1977 نوں رجسٹرڈ کمپنی بݨ گئی۔ سٹیوو وازنیاک نے اپنا حصہ 800 ڈالر سٹیوو تے رونالڈ نوں ویچ دتا۔ اَیپل نوں جدوں رجسٹر کروایا گیا تے اس کمپنی نوں 250،000 ڈالر اک کروڑ پتی مائک مارکلا نے دتّے۔ ایہدے نال نال مائک نے اس کمپنی نوں تھوڑا بوتا ٹوریا۔
ایپل کمپنی نے 1977 چ ایپل 2 کمپیوٹر بنایا جیہڑا کہ اک سافٹویئر پروگرام دی وجہ توں کافی بوہتا وِکیا۔ 1980 چ ایپل نے ایپل 3 کمپیوٹر بنایا جیہڑا گھاٹے وچ پَے گیا۔ اس توں بعد ایپل نے ایپل لیزا کمپیوٹر بنایا جیہڑا کے پہلا کمپیوٹر سی جو گرافیکس دے نال سمجھیا تے ٹوریا جاندا سی۔ پر ایہہ مہنگے ہون اَتے گھٹ سافٹویئر پاروں فلاپ ہو گیا۔ 1984 چ ایپل نے پہلا میکنٹوش کمپیوٹر بنایا جیہدی مشہوری واسطے 1.5 ملین ڈالر مل دا ٹی وی دا اشتہار بنایا گيا۔ اے شروع چ چنگا وکیا پر بعد چ گھٹ وکنا شروع ہو گیا۔ اس دی وجہ وی ایہدا بوہتا مل سی تے گھٹ سافٹویئر۔ 1985 چ سٹیوو جابز ایپل چھڈ گیا تے اوہنے نیکسٹ NeXT Inc. کمپنی بنا لئی۔
ایپل نے اس توں بعد دو نِکّے کمپیوٹر بناۓ 1989 چ میکنٹوش پورٹیبل تے 1991 چ پاووربک۔ پاووربک بوہت ٹُریا جیہدے توں ایپل نے بوہت ترقی کیتی۔ لیکن اس توں بعد ایپل نے کئی نویاں شیواں بنان دی کوشش کیتی پر اوہ ٹر نئیں سکیاں۔ اس دوران مائیکروسافٹ سافٹویئر دے بزار چ بوہت اگے ودھ رہیا سی۔ مائیکروسافٹ سافٹویئر سستا ااَتے عام بناندی سی جدوں کہ ایپل مینگا تے بوہت زيادہ چنگی کوالٹی دا بناندی سی۔ ایپل نے موٹورولا تے آئی بی ایم دے نال رل کے نواں کمپیوٹر سسٹم بنانا شروع کر دتا۔ ایپل نے پہلا میکنٹوش جیہڑا آئی بی ایم دے پاوور پی سی PowerPC پراسسیسر نوں ورتدا اے بنایا جیہدے بعد ایپل پاوور پی سی پراسیسر ورتنا ٹر پیا۔
ایپل نے اکو ڈبے چ پورا کمپیوٹر 1998 چ بنایا جینوں آئی میک iMac آخدے نیں بنایا۔ آئی میک دا نویں قسم دا ڈیزائن سی تے ایہنوں بنان دی ٹیم دا آگو جوناتھن ایوو سی۔ جوناتھن ایوو نے بعد چ آئی پوڈ تے آئی فون دا ڈیزان وی بنایا۔ آئی میک بوہت ودھیا کمپیوٹر سی اتے پہلے پنج مہینیاں اچ اوہدے 800،000 یونٹ وِکے۔ ایپل نے اس دے بعد دے عرصے چ کئی سافٹویئر پروگرام خریدے۔ 24 مارچ 2001 چ ایپل نے میک او ایس ایکس Mac OS Xآپریٹنگ سسٹم بنایا جیہڑا یونکس تے نیکسٹ دے آپریٹنگ سسٹم نوں رلا کے اک چنگا سسٹم بنندا اے۔
2001 چ ایپل نے آئی پوڈ ویچنا شروع کیتا جیہڑا کے انتہائی زیادہ کامیاب رہیا۔ 6 وریاں چ 10 کروڑ آئی پوڈ وکے۔ 2003 چ ایپل دا انٹرنیٹ دے اتے آئی ٹیونز دکان ٹری جیہڑی 0.99 ڈالر دے گانے ویچدی سی تے ائی پوڈ دے نال کم کردی سی۔ آئی ٹیونز وی بوہت ٹریا۔ 2001 دے بعد ایپل دی ڈیزائن ٹیم نے رنگین پلاسٹک دے نال کمپیوٹر بنانے چھڈے دتے۔ اوہناں نے ٹائیٹینیم دا بنیا ہویا لیپٹاپ: پاووربک جی 4، سفید پلاسٹک دی آئی بک تے ڈیسکٹاپ آئی میک بناۓ۔
6 جون 2005 چ سٹیوو جابز نے دسیا کے ایپل 2006 توں انٹل دے پراسیسر آلے میکنٹوش بنانا شروع کر دے گی۔ اوناں میکنٹوشاں تے میک او ایس دے نال نال ورتن آلے مائیکروسافٹ دی ونڈوز ایکس پی یاں ونڈوز وزٹا وی انسٹال کر سکن گے۔
9 جنوری 2007 نوں سٹیوو جابز نے آئی فون تے ایپل ٹی وی دا دسیا۔ آئی فون نویں قسم دا فون سی تے بوہت وکیا۔ اگلے ورھے ایپل نے آئی فون واسطے ایپ سٹور کھولیا جیہدے تے آئی فون دے سافٹویئر وکدے سن۔ اس دے تن مہینے بعد ایپل جگ وچ تیجی سبھ توں بوہتے موبائل فون ویچن آلی کمپنی بݨ گئی۔ 2010 چ ایپل نے ٹیبلٹ کمپیوٹر آئی پیڈ ٹوریا جیہڑا کے بوہت زیادہ وکیا۔ 2010 دی مئی چ 1989 دے بعد پہلی وار ایپل کمپنی دا شیئر مائیکروسافٹ توں زیادہ مل دا ہوگیا۔
2011 دی جون چ ایپل نے آئی کلاؤڈ ٹوریا جیہڑا انٹرنیٹ دے اتے شیواں رکھن دی سروس اے۔ ایہدے اُتّے جیہڑیاں شیواں آئی فون یاں آئی پیڈ اُتّے ہون اوہ انٹرنیٹ اُتّے رکھیاں جاندیاں نیں۔ اکتوبر 2011 وچ ایپل نے آئی فون 4ایس وکھایا جیہدے اچ 8 میگاپکسل دا کیمرا، ڈبل پراسیسر اَتے آواز سن کے کم کرن تے گلاں دسن آلا سسٹم جیہنوں سری Siri کہندے نیں وی ہیگا اے۔