میر
میر خلا وچ سويت یونین دا (بعد وچ روس دا) خلائی سٹیشن سی ۔ روسی زبان وچ میر دے دو مطلب نیں دنیا یا امن ۔ میر خلا وچ پہلا مسلسل انسان بردار تحقیقی خلائی سٹیشن سی تے تیجی پیڑھی (3rd genration) دا وی پہلا خلائی سٹیشن سی ۔
میر دا خلا وچ مسلسل انسان برداری دا 8 دن گھٹ 10 سال دا ریکارڈ اے تے بہت سارے ملکاں دے خلاباز اس تے خلائی شٹلاں دے ذریعے آؤندے تے جاندے رہے ،1991ء وچ سویت یونین ٹٹن ویلے وی ایس تے اک سویت خلاباز موجود سی ۔ سب توں ذیادہ 11 واری امریکہ دیاں خلائی شٹلاں ایس تے خلاباز تے دوجا سامان لے کے آئیاں ۔
میر خلا وچ بہت سارے ماڈلاں نوں جوڑ کے بنایا گیا، جیہڑے 1986ء توں 1996ء تک اک اک کرکے خلا وچ بھجے گئے سن ۔
میر نون خلا وچ قازقستان وچ واقع بیکانور خلائی اڈا توں 19 فروری 1986ء وچ 21:28 وجے عالمی وقت دے مطابق خلا وچ بھیجیا گیا ۔ ایہہ خلائی سٹیشن 23 مارچ 2003ء تک خلا وچ رہیا تے فیر ایس نوں مدار چوں کڈھ کے جنوبی بحرالکاہل وچ ڈیگ دتا گیا ۔ میر خلائی سٹیشن دا وزن 124340 کلوگرام سی ۔ ایہہ زمین دوالے اک چکر 89.9 منٹ وچ مکمل کردا سی تے اک دن وچ زمین دے دوالے 16 چکر لاندا سی ۔ ایس نے خلا وچ زمین دے دوالے 3،63،84،70،307 کلومیٹر دا سفر کیتا ۔
تریخ
سودھو
میر سویت خلائی سسٹم دی تیجی نسل نال تعلق رکھدا اے ۔ 17 فروری 1976ء نوں سیلئوٹ DOS-17K خلائی سٹیشن نوں مزید بہتر کرن دا فیصلہ کیتا گیا جدکہ1971ء توں لے کے 4 سیلئوٹ خلائی سٹیشن خلا وچ بھیجے جا چکے سن۔