گردوارا دربار صاحب کرتارپور

گردوارا دربار صاحب کرتارپور
گردوارا دربار صاحب کرتارپور;
عمومی معلومات
معماری طرز	سکھ فن تعمیر
شہر یا قصبہ	کرتارپور، پنجاب
ملک	پاکستان

گردوارا دربار صاحب کرتار پور، کرتارپور، ضلع نارووال، پنجاب، پاکستان وچ لہور توں 120 کلومیٹر دور اک تاریخی گردوارا اے۔^[۱] ای اس تریخی تھاں اُتے بنایا گیا اے جِتھے گرو نانک دی 23 اسو، سنوت 1596 (22 ستمبر 1539) نوں وفات ہوئی سی۔ ایتھے بابا گرو نانک مقیم ہوئے تے لوکاں نوں دین دی تعلیمات دِتی تے زندگی دا آخری عرصہ ایتھے گزاریا۔

گردوارے دے باغیچے وچ واقع کھوہ گرو نانک دیو نال منسوب کیتا جاندا اے، ایہدے بارے وچ سکھاں دا عقیدہ اے کہ ایہ گرو نانک دے زیر استعمال رہیا۔ ایسے مناسبت نال ایہنوں ‘‘سری کُھو صاحب’’ کہیا جاندا اے۔ گردوارا دربار صاحب کرتار پور بابا گرونانک دی آخری آرام گاہ ہون دی وجہ توں دنیا بھر وچ وسدی سکھ برادری دا پوری دنیا وچ مقدس ترین مقام اے۔

قیام پاکستان 1947ء توں بعد تقریبن 57 سال تک سکھ زائرین اس گرودوارے دی زیارت دے منتظر رہے۔

ایہ گردوارا پاکستان تے مشرقی پنجاب دی سرحد دے کول تقریبن 5 کلومیٹر دے فاصلے اُتے واقع آ مشرقی پنجاب توں با سوکھا دیکھیا جا سکدا اے۔^[۲] سکھاں دی اک وڈی تعداد سرحد اُتے قائم درشن استھان توں دوربین نال دربار صاحب کرتار پور دا دیدار کردی سی۔^[۳]

محل وقوع

ایہ گردوارا پاکستان دے صوبہ پنجاب دے ضلع نارووال وچ، لہور توں تقریبن 120 کلومیٹر دی مسافت اُتے دریائے راوی دے کنارے موجود اے۔ دربار صاحب کرتار پور ریلوے اسٹیشن ایہدے نزدیک اے۔

ساخت

گردوارا دربار صاحب دی قدیم عمارت دریائے راوی وچ آنے والے سیلاب نال تباہ ہو گئی سی۔ موجودہ عمارت 1920ء توں 1929ء دے درمیان ریاست پٹیالا دے مہاراجہ بھوپندر سنگھ نے 1,35,600 روپے دی لاگت نال دوبارہ تعمیر کروائی سی۔ 1995ء وچ حکومت پاکستان نے ایہدی مرمت کروائی۔ جولائی 2004 تک گردوارا مکمل طور پر بحال کر دِتا۔ 2019ء وچ حکومت پاکستان نے تے نویں تعمیرات کروا کے گردوارے نوں توسیع دِتی تے کرتارپور لانگھا بنا کے ایہنوں مشرقی پنجاب نال مُنسلک کردِتا۔ ایہ گردوارا سڑک تے ریلوے دے ذریعے لہور نال جُڑیا ہویا اے۔