گامینید
گانیمید مشتری دا چند اے تے اپنی جسامت دے لحاظ نال اوہ نظام شمسی دا سب توں وڈا چند اے ۔ ترتیب دے لحاظ نال اوہ مشتری دا ستواں چند اے ۔ اس نوں گیلیلیو نے 11 جنوری 1610 نوں دریافت کیتا ۔ ایہہ ست دناں چ اپنے مدار چ اک چکر مکمل کردا اے ۔ جسامت دے لحاظ نال ایہہ سیارہ عطارد نالوں وی وڈا اے پر کمیت دے حساب نال اس دا ادھ اے ۔ اس دے اجزاء چ لوہے دی مقدار بوہت زیادہ اے تے اس تے برف وی پائی جاندی اے ۔ خیال کیتا جاندا اے کہ اس دی سطح دے 200 کلومیٹر تھلے برف دی تیہاں چ دبئیا ہوئیا اک لونے پانی دا سمندر وی اے اس دی ہوا چ آکسیجن دی تھوڑی جنی مقدار وی شامل اے ،جس چ عام آکسیجن دے علاوہ اوزون وی اے ۔
