کناݪی
کناݪی اک فلیٹ، گوݪ تے اُٹھویں کنارےآں آݪا، مٹی دا برتݨ اے، جیہدی بناوٹ پرات یا تھاݪ ورگی ہُندی اے۔ کناݪی پنجاب وچ اک عام ورتوں دا پعھانڈا اے جو زیادا تر آٹا گُنّھݨ لئی ورتیا جاندا اے، اس توں علاوا ایہنوں بطور پرات، تھاݪ یا ٹرے، کھاݨ پیݨ آݪیاں چیزاں رکھݨ لئی وی ورتیا جاندا اے۔ کمھار دے بݨائے جاݨ آݪے مٹی دے پعھانڈےآں وِچوں کناݪی زیادہ فروخت ہوݨ آݪا اک اہم پعھانڈا اے۔
جولاہے وڈی کناݪی وچ سوت تعھوندے نیں جیہنوں کناݪ کہیا جاندا اے۔ پنچھیاں نوں خوراک دیݨ لئی وی کناݪیاں ورتیاں جاندیاں نیں۔
گوت کناݪا/گوت کناݪی سودھو
گوت کناݪا پنجابی رہتل وچ ویاہ دی اک رسم اے، جد لاڑھی لاڑھے دے گھر آؤندی اے تاں لاڑھے دے گھر دیاں سواݨیاں لاڑھی نوں اپݨے ناݪ شامل کرکے اک کناݪی وچ کھاݨا پاکے اوہدے آݪے دواݪے بیٹھ کے کھاݨا کھاندیاں نیں۔ ایہدا مقصد لاڑھی نوں اپݨی گوت یا گھرانے وچ شامل کرنا ہُندا اے۔
| کناݪیاں | ||||
|---|---|---|---|---|
|
|
| ||