پاکستان ٹیلی ویژن کارپوریشن

پاکستان ٹیلی ویژن کارپوریشن
قسم	براڈکاسٹ; سیٹلائیٹ ٹیلی ویژن;
Branding	پاکستان ٹیلی ویژن
دیس	پاکستان
مہیا	پاکستان تے دُنیا بَھر
ہیڈکوارٹر	اسلام آباد
Broadcast area	پاکستان تے دُنیا
مالک	وزارت اطلاعات و نشریات; حکومت پاکستان
Key people	- ; (مینیجنگ ڈائریکٹر)
شروع کرن دی تاریخ	۲۶ نومبر ۱۹۶۴؛ 60 سال پہلے
Picture format	1080p HDTV (downscaled to 16:9، 576i for SDTV sets)
سرکاری ویبسائیٹ	www.ptv.com.pk

پاکستان ٹیلی ویژن نیٹ ورک (انگریزی: Pakistan Television Corporation) حکومت پاکستان د‏‏ی ملکیت وچ اک سیٹلائیٹ ٹیلی ویژن نیٹ ورک اے۔

قیام

پاکستان وچ ٹیلی ویژن دا آغاز 26 نومبر 1964ء نوں لاہور دے سٹیشن توں ہویا۔ حکومت پاکستان نے اکتوبر 1964ء وچ تجرباتی بنیاد تے جپان دی اک فرم نپن الیکٹرک کمپنی دے تعاون نال پاکستان دے 2 شہراں لاہور تے ڈھاکا وچ ٹیلی ویژن سٹیشن کھولݨ دا فیصلہ کیتا تے 26 نومبر 1964ء نوں لاہور تے 25 دسمبر 1964ء نوں ڈھاکا وچ ٹیلی ویژن سٹیشن کھولے گئے۔ ایہ دونوں سٹیشن شروع وچ روزانہ 3 گھینٹھے دی نشریات دا اہتمام کر دے سن تے ستوارے وچ اک دن یعݨی پیر نوں ٹی وی دی نشریات نہیں ہُن٘دی سی۔ شروع شروع وچ ٹی وی دے سارے پروگرام سٹیشن وچ تیار نہیں ہُندے سی بلکہ نشریات دا زیادہ حِصہ درآمدی تے دستاویزی معلوماتی پروگراماں اُتے مبنی ہُن٘دا سی۔

پروگرامز

درآمدی فلماں وچ ’سکس ملیئن ڈالر مین‘، ’بائیونک وومین‘، ’چیس‘، ’بارن فری‘، ’ڈیفرنٹ سٹروکس‘، ’لٹل ہاوس آن پریری‘، ’پلینیٹ آف ایپس‘،’ایئر وولف‘،’ تھری اینجل‘،’کولمبو‘، ’ٹام اینڈ جیری‘،’پنک پینتھر‘،’لوسی شو‘ تے ’شرلاک ہومز‘ قابل ذِکر نیں۔

بعد وچ پی ٹی وی نے وی ایس نوعیت دیاں دستاویزی فلماں بݨاؤݨا شروع کر دتیاں تے معروف پروڈِیوُسر عبید اللہ بیگ نے ٹیلی ویژن لئی دستاویزی فِلماں دا آغاز کیتا۔ ایہناں دیاں زیادہ تر فِلماں شکاریات، جنگلات تے تعمیرات دے متعلق نیں۔ ایہناں توں بعد شیریں پاشا، قریش پور، ناظم الدین تے ظہیر بھٹی نے وی دستاویزی فِلماں تیار کیتیاں۔

براہ راست نشریات

شروع شروع وچ ٹی وی پروگرام براہ راست نشر ہُندے سن۔ جد اک لائِیو پروگرام ختم ہُندا تاں ایس توں بعد درآمدی یا دستاویزی فِلم لا دِتی جان٘دی سی تے ایس وقفے وچ دوسرے لائیو پروگرام دا سیٹ لا دتا جاندا سی۔

پہلا ڈراما

پی ٹی وی نے اپݨا پہلا ڈراما ’نذرانہ‘ پیش کیتا جیہدے وچ محمد قوی خان، کنول نصیر تے منور توفیق نے اداکاری کیتی۔ ایہدا سکرِپٹ نجمہ فاروقی نے لِکھیا سی تے ایہنوں ڈائریکٹ فضل کمال نے کیتا سی۔ پہلا باقاعدہ ڈراما سیریئل "ٹاہلی تھلے" اے۔ ایہ پنجابی ڈراما سی۔ ایہدا سکرپٹ اشفاق احمد مرحوم نے لِکھیا۔

باقاعدہ سٹیشن

اوہناں دناں وچ پی ٹی وی، ریڈیو پاکستان دے احاطے وچ اک چھوٹے جیہے کمرے وچ سی۔ ایس اسٹیشن دا افتتاح اوس ویلے دے صدر ایوب نے کیتا سی تے پہلی انائونسمنٹ طارق عزیز نے کیتی سی۔ پاکستان ٹیلی ویژن دے پہلے کیمرا مین انیس احمد نیں تے پہلا گانا طفیل نیازی نے گایا۔ ایس گاݨے دی موسیقی امیر حیدری نے ترتیب دتی سی۔ 1972 چ ریڈیو پاکستان دی عمارت دے نال ای پی ٹی وی دی الگ عمارت بن گئی جیہدا افتتاح 1972ء وچ اوس ویلے دے وزیراعظم ذوالفقار علی بھٹو نے کیتا۔ وقت دے نال نال ٹیلی ویژن وچ مسلسل ترقی ہُندی رہی۔

اہم شخصیات

پاکستان ٹیلی ویژن دے آغاز وچ کچھ شخصیات نیں جیہناں دے تذکرے توں بغیر پی ٹی وی دی تاریخ شاید ادھوری رہوے ایہناں شخصیات وچ نثار حسین، ذکاء درانی، اسلم اظہر، محمد نثار حسین، جمیل آفریدی، شہنشاہ نواب، بختیار احمد، فضل کمال، مختار صدیقی، آغا بشیر، شہزاد خلیل، فرح سیر، آغا ناصر، کمال احمد رضوی، رفیع خاور ننھا، عون محمد رضوی، قمر چوہدری، نذیر حسینی، سمیعہ ناز، ماہ رخ نیازی، طارق عزیز، کنول نصیر، قوی خان، روحی بانو، ریحانہ صدیقی شامل نیں-

رنگین ٹی وی

1976ء وچ پاکستان ٹیلی ویژن رنگین ہو گیا۔ پہلا رنگین ڈراما "پھول والوں کی سیر" سی جیہدے وچ آصف رضا میر تے خالدہ ریاست نے اداکاری کتیی۔ سکرپٹ اشفاق احمد نے لکھیا تے ایہنوں ڈائریکٹ محمد نثار حسین نے کیتا سی۔

علاقائی سٹیشنز

لاہور تے ڈھاکا وچ 1964ء وچ ٹی وی سٹیشن قائم ہوئے تے کراچی ٹی وی سٹیشن 2 نومبر 1967ء نوں قائم ہویا۔ ایہ پہلا مکمل ٹی وی سٹیشن سی جیہڑا موبائل یونٹ، 2 سٹوڈیوز تے پروڈکشن دی جدید سہولیات نال لیس سی۔ ایس توں بعد اسلام آباد، کوئٹا فیر پشاور وچ پاکستان ٹیلی ویژن دے سٹیشنز قائم کیتے گئے۔

چینلز

پی ٹی وی دے مختلف چینل نیں۔ جیہناں وچ پی ٹی وی ہوم، پی ٹی وی نیوز، پی ٹی وی ورلڈ، پی ٹی وی گلوبل، پی ٹی وی سپورٹس تے پی ٹی وی نیشنل شامل نیں۔

سٹیلائیٹ

پاکستان ٹیلی وژن دا پہلا چنیل پی ٹی وی ورلڈ مصنوعی سیارے دے ذریعے تقریبن 32 ممالک وچ دکھایا جاݨ لگ گیا۔ بعد وچ پی ٹی وی تے چینل تھری نوں وی مصنوعی سیارے دے ذریعے دکھایا جاݨ لگ گیا۔ جون 2005ء وچ چینل تھری نوں اک پرائیوٹ ادارے دے سپُرد کردتا گیا، ایہدا ناں اے ٹی وی رکھ دتا گیا۔ اگست 2007ء وچ پی ٹی وی وَن نوں پی ٹی وی ہوم تے پی ٹی وی ورلڈ نوں پی ٹی وی نیوز بنا دتا گیا۔

ماہانہ ٹی وی ٹیکس اُتے تنقید

پاکستان وچ بجلی دے میٹر دا ہر صارف بجلی دے بِلاں دے ذریعے 35 روپے براہ راست پاکستان ٹیلی ویژن دے کھاتے وچ جمع کراؤن دا پابند اے۔ لوک ایس جبری اقدام اُتے شدید تنقید کردے نیں کہ ایہ ادارہ عوام دیاں جیباں اُتے ناجائز ڈاکا مار رہیا اے، ایہ ٹیکس غیر قانونی اے۔ ایہدے خلاف لوکاں نے عدالت وچ رِٹ وی داخل کروائی ہوئی اے۔