نیاگرا چھمبر

نیاگرا کینیڈا تے امریکہ دے وشکار دریاۓ نیاگرا تے اک چھمبراے۔ براعظم اتلے امریکہ چ کینیڈا تے امریکہ دی ولگن تے واقع جگ دی مشہور ترین چھمبر "نیاگرا چھمبر" واقع اے ۔ جسنوں حسن فطرت دا اک وڈا شاہکار تے قدرتی عجائبات چوں اک سمجھئیا جاندا اے تے ایہہ جگ چ سیاحاں دی پسندیدہ تھانواں چ وی شامل اے ۔

نیاگرا چھمبر

آلا دوالا

نیاگرا چھمبر دا فضائی نظارا

ایہہ چھمبرکینیڈا دے صوبے اونٹاریو تے امریکہ دی ریاست نیو یارک دے درمیان واقع اے ۔

تریخ

اسنوں پہلی وار 1678ء چ فادر لوئس ہپی پن نے لبھئیا سی ۔ 1759ء چ سیورڈی لاسالی نے ایتھے اک قلعہ " فورٹ کاؤنٹی" قائم کیتا جس دا ناں بعد چ " فورٹ نیاگرا " ہوگئیا ۔ انگریزاں نے سر ولیم جانسن دی قیادت ہیٹھ جنگ چ ایہہ قلعہ فرانسیسیاں توں کھوئیا ۔ 1819ء چ دریائے نیاگرا نوں امریکہ تے کینیڈا وچکار سرحد منئیا گئیا تے 1848ء چ نیاگرا نوں قصبے دا درجہ دے دتا گئیا ، ایہی قصبہ 1892ء چ شہر دا روپ اختیار کر گئیا ۔

چھمبراں دا وکھالہ

سکائیلون ٹاور توں کینیڈین ہارس شور چھمبر دا منظر

امریکہ تے کینیڈا توں ہوائی جہاز ، ریل گڈی یاں سڑک راہیں نیاگرا اپڑیئا جا سکدا اے ۔ دوناں دیساں وچکار بذریعہ نیاگرا رابطہ ریل راہیں ای اے ۔ دریائے نیاگرا تے دو پل واقع نیں ، جنہاں چ "قوس قزح پل " بوہت مشہور اے ، جہڑا 1941ء چ اسارئیا گئیا سی ، اس دا تعمیراتی حسن اج وی برقرار اے ۔ قوسی شکل چ اسارئیا گئیا ایہہ پل امریکہ تے کینیڈا وچکار مصروف ترین گزرگاہ اے ۔

نیاگرا چھمبر دا بوہتا سوہنا حصہ کینیڈا ول اے ، جس نوں ویکھن لئی قوس قزح پل توں پیدل یاں گڈی راہیں کینیڈا چ داخل ہوئیا جا سکدا اے ۔ امریکہ تے کینیڈا دے شہریاں نوں سرحد ٹپن لئی ویزے دی لوڑ نئیں پر دوجے ملکاں دے لوکاں لئی ویزا لازمی اے ۔

دریائے نیاگرا براعظم اتلے امریکہ دیاں وڈیاں جھیلاں چوں دو جھیلاں جھیل ایری تے جھیل اونٹاریو توں ملاندا اے ۔ اس دریا چ واقع جزیرہ گوٹ دریائے نیاگرا نوں دو حصیاں چ ونڈدا اے جس نال نیاگرا دیاں عظیم چھمبراں جنم لیندیاں نیں ۔ اصل چ نیاگرا چھمبر دے تن وڈے حصے نیں ، جنہاں چ سب توں وڈا تے متاثرکن کینیڈین حصے ول اے تے گھوڑے دی نعل دی شکل چ ہون پاروں "ہارس شو" یعنی گھوڑے دا کھر کہلاندا اے ۔ اس چھمبر دی لمبائی 173 فٹ تے چوڑائی 2500 فٹ اے ۔ امریکہ ول دی چھمبر نوں امریکی چھمبر آکھئیا جاندا اے ، جس دی لمبائی 182 فٹ اے تے چوڑائی 1100 فٹ اے ۔ تیجی کجھ چھوٹی چھمبر برائیڈلویل چھمبر(Bridal Veil) کہلاندی اے ۔ اینہاں تناں چھمبراں توں فی سیکنڈ 202،000 معکب فٹ پانی تھلے ڈگدا اے یعنی اک منٹ چ تقریبا 60 لکھ ٹن پانی 180 فٹ دی بلندی توں تھلے آندا اے تے ایسے عظیم نظارے نوں ویکھن لئی ہر ورہے تقریبا 40 لکھ سیاح نیاگرا دا رخ کردے نیں ۔ کشتی راہیں نیاگرا چھمبر دا بوہت نیڑے توں وی نظارا کیتا جاسکدا اے ، جدوں کہ چھمبر دے پانی توں بنن آلی حسین قوس قزح دا فضائی نظارا کروان لئی ہیلی کاپٹراں دیاں پروازاں وی ہندیاں نیں ۔

نیاگراچھمبر دے پارک

امریکی چھمبر تے ہارس شو چھمبر دا کینیڈا توں نظارا

نیاگرا چھمبر دا علاقہ دوہاں ملکاں چ قومی پارک دا درجہ رکھدا اے تے امریکہ چ نیاگرا ریزرویشن پارک تے کینیڈا چ ملکہ وکٹوریہ نیاگرا پارک کہلاندا اے ۔ نیاگرا ریزرویشن سٹیٹ پارک ریاست ہائے متحدہ امریکا دے پرانے پارکاں چوں اک پارک اے جہڑا 1885ء چ امریکی حکومت نے اپنے انتظام ہیٹھ لئیا سی ۔ ایہہ پارک 107 ایکڑ رقبے تے پھیلئیا ہوئیا اے ، جدوں کہ ملکہ وکٹوریہ نیاگرا پارک 154 ایکڑ رقبے تے محیط اے ۔

پن بجلی

اپنے شاندار حسن پاروں اہم ترین سیاحتی تھاں ہون دے علاوہ ایہہ چھمبر اونٹاریو تے نیو یارک لئی پن بجلی دے وڈے وسیلے دا باعث وی اے ۔

بارلے جوڑ

• نیاگرا دی تریخ
• نیاگرا دا جغرافیہ
• نیاگرا دا نظارہ Archived 2006-10-09 at archive.ph
• نیاگرا اتے مددگار لکھتاں Archived 2008-12-24 at the وے بیک مشین
• ڈیجیٹل ذخیرہ

نیاگرادے بارے مواد دے جوڑ

• نیا گرااتے کتاب
• نیا گرا دی تریخ Archived 2012-07-23 at the وے بیک مشین
• [۱]