مزڈا آر ایکس 8
مزڈا آر ایکس 8 جپان دی کمپنی مزڈا دی اک کھیڈ کار اے۔ کوپے کھیڈ کاراں دا اک مسئلا ہوندا اے کہ اوناں دی پجھلی سیٹاں کھلیاں نئیں ہوندیاں تے ڈگی بوت نکی ہوندی اے مطلب گڈی دا سارا مل اودی ٹوور دا ہوندا اے مگر آر ایکس 8 تھوڑی وکھری اے۔ اے جگ دی سب توں سوہنی گڈی وی نئیں اے بلکہ اینوں ویکھ کہ لگدا اے کہ مزڈا آلیاں نیں مشوریاں دا اک ڈبہ رکھیا جیدا وچ ہر کسے نیں اپنے خیال پاۓ تے مزڈا دے مستریاں نیں کیا اے ٹھیک اے کہ ایناں سارے خیالاں نوں من لیندے نیں ! اس گڈی دے ڈیزائن وچ تکوناں، گول چکر تے فورڈ فیئسٹا ورگے پچھلے شیشے ہیگیاں نیں۔ مزڈا آر ایکس 8 اک کوپے وی نئیں نا ای 4 دروازیاں آلی سالون گڈی اے: ایدے اگلے بوۓ کھولو تے کھیڈ کار آلیاں سیٹاں دسدیاں نیں تے پچھلے نکے دروازے نیں جیناں نوں کھولو تے پچھلیاں سیٹاں وی ہیگیاں نیں۔ جس نال اے کوپے تے سیلون دوواں دے کم کردی اے۔
کھیڈ کاراں دے حساب نال اے سستی وی اے۔ پاکستان وچ اے گڈی 13 توں 17 لکھ دی وکدی اے۔ مزڈا دی پچھلی کھیڈ کار آر ایکس 7 دی قیمت پورشے دے برابر دی ہوندی سی۔ اس دا ایہ مطلب بلکل نئیں کہ اوناں نیں گڈی وچ کوالٹی کٹ کیتی اے: ایدے وچ اے سی، سیٹلائٹ راہ دس، سٹیریو وغیرہ سب کج اے۔ اس قسم دیاں گڈیاں دے بوت وڈے انجن ہوندے نيں مگر آر ایکس 8 دے بونٹ تھلے اک 1.3 لٹر انجن اے۔ اے 1.3 لٹر ہون دے باوجود 228 ہارس پاؤر بناندا اے، اس دی وجہ ایہ وے کہ اے انجن وینکل ڈیزائن دا اے۔ ایہ انجن بوت ہموار ٹردا اے۔ ایدے اندر اک الارم جیا ہوندا اے جیڑا توانوں دسدا اے کہ گیئر بدلو۔
اینوں تیز چلانا دوجیاں کھیڈ کاراں دے حساب نال بوت سوکھا اے تے ایہی اسدی سب توں خاص گل اے۔