عاشق علی فیصل
گن: پنجابی مخولیہ شاعری

عاشق علی فیصل پنجابی دے شاعر نیں[۱]

اصل ناں عاشق علی،تخلص فیصل تے قلمی ناں عاشق علی فیصل اے-22نومبر1971ء نوں محمد انور ہوراں دے گھر لوہان بھرائی والا نارووال وچ پیدا ہوئے۔ ایہناں دے ابا جی محمد انور لال مل فیصل اباد وچ نوکری کردے سن۔ دسمبر 1971ء دی جنگ پاروں پنڈ چھڈنا پیا تے اوہ بال پروار نوں لے کے فیصل آباد آ گِئے تے لال مل دے کوارٹراں وچ رہائش کر لئی۔ عاشق علی فیصل ہوراں مڈھلیاں تن جماعتاں ایم سی پرائمری سکول فیکٹری ایریا فیصل آباد توں پاس کیتیاں۔ 1982ء وچ جدوں فیصل آباد نوں چھڈنا پیا تاں واپس پنڈ پرتن دی بجائے محمد انور ہوراں اپنے پروار سمیت اپنے سوہرے پنڈ 644 گ ب جا ڈیرا لایا۔ (ایتھے ایہ گل ذکر جوگ اے جے عاشق علی فیصل 3 اپریل 1982ء نوں ایس پنڈ آئوندے نیں۔ جتھے اک دن پہلاں پنجابی دے مشہور ڈرامہ لیکھک میجر اسحاق محمد دنیا توں رخصت ہوئے سن) اپنے نانکے پنڈ دے پراِئمری سکول توں پنجویں پاس کیتی تے گورنمنٹ ہائی سکول 644 گ ب توں 1989ء وچ دسویں دا امتحان پاس کیتا۔ 1989ء وچ دسویں دے پیپراں وچکار ای اوہناں دے ماں جی چلانا کر گئے۔جیس پاروں اوہناں دا باقاعدہ تعلیمی سفر اک وار رک گیا۔ پر اوہناں ہمت نہ ہاری۔ ایف اے لاہور بورڈ توں پرائیویٹ پاس کیتا۔ علامہ اقبال اوپن یونیورسٹی توں بی اے تے سرگودھا یونیورسٹی توں ایم اے پنجابی دا امتحان 810/1000 نمبر لے کے پاس کیتا تے گولڈ میڈل حاصل کیتا۔ علامہ اقبال اوپن یونیورسٹی اسلام آباد توں پنجابی وچ ایم فل کر چکے نیں۔

1996ء وچ اوہناں دی شادی جڑانوالا شہر وچ ہوئی۔ ویاہ مگروں ایہ اپنے وڈے بھرا مبارک علی کول آ گئے جہڑے پسرور شہر وچ چونڈہ پھاٹک کول رہندے سن۔ 2000ء وچ ایہناں دے ابا جی محمد انور پردیسی تے 2012ء ایہناں دے بھائی مبارک علی فوت ہوئے۔ اہہ دوویں شاہ ببن قبرستان وچ ابدی نیند سُتے پئے نیں۔ مبارک علی دا بال پروار اج وی ایتھے ای وس رہیا اے۔ مبارک علی دا وڈا پتر عبداللہ قیصر وی پنجابی وچ شاعری کر دا اے۔ ڈسکہ تحصیل دے پنڈ ترگڑی وچ ایہناں دا مرشد خانا اے۔ ایس پنڈ وچ ایہناں دی قریبی عزیز داری وی اے۔ ایہناں دے دادا جی دے چاچے دے سپتر دین محمد ایتھے آن وسے سن جہناں دا پڑپوتا ڈاکٹر طارق محمد آکاش اردو پنجابی دا ودھیا لکھاری اے۔ عاشق علی فیصل صدائے عام دی نوکری دوران بہتا چر ایس پنڈ وچ اپنی وڈی بھین کول ای گزاریا .

روزی روٹی دے چکر نے عاشق علی فیصل نوں اک وار فیر فیصل آباد لے اندا۔ اوہ 2005ء توں 2009ء تک غزالی سکول اڈہ پُل 93 گ ب رہے۔ تے اجکل ستیانا تحصیل جڑانوالا دےلاگلے پنڈ چک نمبر 30 گ ب نواں جالندھر وچ بال پروار سمیت وس رہے نیں۔ غزالی سکول چک نمبر 30 گ ب دے وائس پرنسپل نیں تے جامع مسجد گُلزار مدینہ وچ امامت تے خطابت دی سعادت حاصل کر رہے نیں۔ چھے دھیاں تے اک سپُتر محمد علی فیصل اے جیہڑا پہلی جماعت وچ پڑھدا اے۔

1991ء وچ ایہناں رویل ادبی اکیڈمی جڑانوالا دی نیہیہ رکھی۔ایس اکیڈمی دے تحت ایہناں علاقے دے سکولاں وچ کئی تقریری مقابلے پنجابی وچ کروائے۔ایہناں کتاب لڑی رسالا "کوک" وی جاری کیتا جہدے ہن تک 12شمارے چھپ چکے نیں۔ اجکل ایہدا نعت نمبر شایع کرن دی تیاری کر رہے نیں۔

مشہور کہانی گار تے صحافی الیاس گھمن دی ادارت وچ چھپن والے مہیناوار "رویل" لاہور" تے محمد رفیق باجوہ دے ہفت روزہ اخبار " صدائے عام" سیالکوٹ، پنجابی بال رسالے مہیناوار "میٹی" تے مہیناوار "پکھیرو" ۔دے اسسٹنٹ ایڈیٹر وی رہے نیں۔

"پنجابی کھوج گڑھ" للیانی ضلع قصور وچ اقبال قیصر نال وی کم کردے رہے۔

عاشق علی فیصل رویل ادبی اکیڈمی جڑانوالہ دے صدر نیں جد کہ ادبی دائرہ پسرور دے نائب صدر وی رہے نیں۔

ایہ ہر فن۔مولا نیں۔ شاعر وی نیں تے کہانی کار وی۔ پنجابی اخباراں لئی کالم وی لکھدے نیں تے لیکھ وی۔ پنجابی تے اردو وچ لکھدے نیں۔ گرمکھی رسم الخط وی لکھ پڑھ لیندے نیں۔

ایہناں دیاں چھپیاں ان چھپیاں کتاباں دا ویروا کجھ انج اے:

  1. - لکیراں پنجابی نظماں دا پراگا اے جہدے وچ 77 نظماں شامل نیں۔
  2. - بابا گلو شاہ قادری: اس کتاب وچ بابا گلو شاہ قادری کورے کی والیاں دی حیاتی تے اوہناں بارے لکھی تارا سنگھ عاجز دی کتاب دا متن شامل اے۔
  3. - چنگی مت: بال شاعری دا مجموعہ اے۔
  4. .گلزار ترگڑی: اپنے پیر و مرشد بابا جی شکر دین تے سرکار جی علی محمد ترگڑی شریف والیاں دی منقبت۔
  5. - جبریل کے مہبط پر۔ اردو نعتاں دا مجموعہ اے۔
  6. - جڑانوالہ دا ادبی منظر نامہ: تحصیل جڑانوالہ نال تعلق رکھن والے شاعراں ادیباں دیاں کتاباں دا تجزیاتی مطالعہ۔ اس وچ پنجابی تے اردو وچ چھپیاں تقریبن 100 دے نیڑے تیڑے کتاباں دا ویروا کیتا گیا اے۔
  7. - پیرس دی پیاس: سنتوکھ سنگھ سنتوکھ داں نظماں دا التھا
  8. - ظلم ک انصاف: امریکہ وسدے پنجابی لکھاری گردیپ سنگھ متھڈا دیاں کہانیاں دا التھا
  9. - بھلا کیہ کر لیا اے: ہنجابی غزلاں دا پراگا۔
    میری دھرتی میرے لوک: چکنمبر 30 گ ب بارے جانکاری
    ماپے تینوں گھٹ رون گے۔ شخصی لیکھاں دا پراگا
    پنجابی ادب وچ گلزار نویسی دی روایت: عاشق علی فیصل دا ایم فل دامقالہ اے جہدے وچ اوہناں پنجابی ادب وچ ہن تک لکھیاں جان والیاں 150 توں ودھ گلزاراں دا ذکر کیتا اے۔ جہدے وچ راقم اکبر علی غازی دی لکھی ہوئی گلزار ”گلزارِ اکبر“ وی شامل اے۔

نمونہ کلام سودھو

سہمے تے گھبرائے دن

ایہہ کہیو جئے آئے دن

سورج رات دے بوہے تے

اپنی خیر منائے دن

سُکھ سنیہڑا جیون دا

سانوں آن سنائے دن

سجناں تیریاں یاداں نے

ساڈے تے مہکائے دن

رب کسے نوں میرے جہے

فیصل نہ دکھلائے دن

حوالہ جات سودھو

اتہ پتہ سودھو