شیرشاہ سوری دا مقبرہ
شیر شاہ سوری دے پرکھے افغانستان توں آئے سن۔ شیر شاہ دے پیؤ حسن خان دیاں دو بیویاں اتے 8 بچے سن۔ متریئی ماں ولوں تنگ کیتے جان کارن اوہ گھروں دوڑ کے پنجاب دے افغان رئیس جمال خان دی نوکری کرن لگا۔ ماں نے اتھے وی پچھا نہ چھڈیا تاں اوہ بہار دے راجا (گورنر) بہار خان لوہانی دی سیوا وچ کم کرن لگ پیا۔ پھر بابر دا فوجی بنیا۔ کسے نوں وی ایہہ چت-چیتے نہیں سی کہ اک دن ایہی فوجی بابر دے پتر ہمایوں نوں دھوڑ چٹائیگا۔ شیر شاہ فوجی توں سپہ سالار، کرندے توں کمانڈر اتے بہار دا گورنر بنیا اتے پھر اک دن ہندوستان دا شہنشاہ۔ اس نے 26 جون، 1539 نوں مغل شہنشاہ ہمایوں نوں چوسا اتے مئی، 1540 نوں قنوج دیاں لڑائیاں وچ ہرا کے شمال مشرقی بھارت وچ اپنا راج قائم کیتا اتے راجگڑھ دلی بنائی۔ اس بہادر بہاری پٹھان نے مغل بادشاہ نوں بھارت چھڈن لئی مجبور کر دتا۔ اس توں پہلاں 1534 وچ سورجگڑھ دی لڑائی وچ بنگال دے سلطان غیاث الدین محمود شاہ دے جرنیل ابراہیم خان دی فوج ہرا کے بہار اُتے قبضہ کیتا اتے 1538 وچ بنگال اپر حملہ کرکے اس نے غیاث الدین نوں وی ہرایا۔
اپنے پنج سال (1540–1545) دے راج دوران شیر شاہ سوری نے کمالاں کر وکھائیاں۔ ودھیا شہری اتے فوجی انتظم قائم کیتا، پہلاں روپیہ چلایا، جو بھارت سمیت کوئی 8-10 ملکاں دی قومی کرنسی دی بنیاد بنیا، تن دھاتاں دا سکہ-نظام چلائیا، جو بعد وچ مغلاں دی پہچان بنی۔