جھولویں کرسی

جھولویں کُرسی (Rocking chair) اک قِسم دی کرسی اے جیہدے وچ مُڑے ہوئے بینڈ (curved bands) ہُندے نیں جیہناں نوں راکرز وی کہیا جاندا اے۔ ایہ کرسی دیاں لتاں دے تھلے مُنسلِک ہُندے نیں جیہڑے پِچھلیاں تے اگلیاں لتاں نوں آپس وچ جوڑدے نیں۔ راکرز فرش توں صِرف دو پوائنٹس اُتے مربوط ہُندے نیں، جو بیٹھݨ آݪے نوں اپݨا وزن بدل کے یا اپݨے پیراں ناݪ ہلکا زور لا کے اگے پِچھے جھولݨ دی صلاحیئت فراہم کردے نیں۔ راکنگ کُرسیاں زیادا تر لکڑی دیاں بݨیاں ہُندیاں نیں۔

جھولویں کُرسی

جھولویں کُرسی

جھولویں کُرسی

جھولویں کُرسی

لوڑ

جھولویاں کُرسیاں نوں اکثر چھوٹے بالاں واسطے ورتیا جاندا اے کیونکہ ایہدے جھولݨ ناݪ آرام تے نیند دا غلبا طاری ہو جاندا اے۔

بہت سارے بالغ لوکاں نوں ہلکی حرکت دی وجہ توں راکنگ کُرسیاں آرام دہ لَگدیاں نیں۔ پڑھائی کرن تے موبائل فون یا کمپیوٹر اُتے کم کرن دے دوران اکثر لوک راکنگ کرسیاں ورتدے نیں۔

تریخ

اگرچے امریکی موجد بینجمن فرینکلن نوں بعض اوقات جھولویں کرسی ایجاد کرن دا سہرا دِتا جاندا اے، تاہم مورخین دراصل 18ویں صدی دے اوائل وچ راکنگ کرسیاں دی ابتداء شمالی امریکا توں کردے نیں، جد فرینکلن اک نیاݨا سی۔ اصل وچ ایہ کُرسیاں، باغات وچ استعمال کیتیاں جاندیاں سی، اوہ صرف عام کرسیاں سی جیہناں دے ناݪ راکرز جُڑے ہوئے سی۔ انگلینڈ وچ 1725 وچ ابتدائی راکنگ کرسیاں پہلی بار نمودار ہوئیاں۔ 18ویں صدی دے وسط وچ امریکا وچ ویکر راکنگ کرسیاں دی پیداوار اپݨے عروج اُپر پہنچ گئی۔ ایہ ویکر راکرز اپݨی دستکاری تے تخلیقی ڈیزائن وچ مشہور سی۔

1830 دی دہائی دے دوران پیٹر کوپر امریکی صنعت کار تے موجد نے امریکا وچ پہلی سٹیل دی کرسی ڈیزائن کیتی جیہڑی اک جھولویں کرسی سی تے 1851 وچ کرسٹل پیلس دی نمائش وچ ایہدا دکھاݪا کیتا گیا۔

مائیکل تھونیٹ، اک جرمن کاریگر نے 1860 وچ پہلی بینٹ ووڈ راکنگ کُرسی بݨائی۔ ایہ ڈیزائن، ایہدی خوبصورت شکل تے ایہدے ہلکے وزن دی وجہ توں مُنفرد اے۔ ایہ جھولویاں کرسیاں یونانی تے رومن ڈیزائن دے ناݪ ناݪ نشات ثانیا تے نوآبادیاتی دور دی فنکاری توں متاثر سی

تاہم 1920 دی دہائی دے دوران، فولڈنگ راکنگ کرسیاں، امریکا تے یورپ وچ زیادا مقبول ہوئیاں۔ اوہ بیرونی سرگرمیاں تے سفر دے مقاصد لئی کارآمد سی۔ 1950 دی دہائی تک اک امریکی کاریگر سام مالوف دی بݨائیاں ہوئیاں راکنگ کُرسیاں اپݨی پائیداری تے ڈیلکس شکل توں مشہور ہو گئیاں۔