تسمینہ احمد شیخ
جنمستھان : لندن, انگلستان
جمن دیہاڑا : 5 اکتوبر 1970
جماندرو ناں : تسمینہ عندلیب رضوی
تعلیم : ایم۔اے، ایل۔ایل۔بی
دیس : پاکستان
دوجی شہریت : سکاٹش
کم : اداکار، سیاستدان، قنون دان
سیاسی جماعت : سکاٹش نیشنل پارٹی
عُہدا : ممبر پارلیمنٹ (مئی2015 - جون2017)
گھر آلا : ذوالفقار احمد شیخ
نیاݨے : 4

تسمینہ احمد شیخ پاکستانی نژاد سکاٹش نیں۔ اوہناں نے سکاٹلینڈ دی مقامی سیاست وچ سرگرم کردار نبھیایا ایس توں علاوہ پاکستانی ڈرامیاں چ اداکاری وی کیتی۔

مُڈھلی حیاتی تے تعلیم سودھو

تسمینہ احمد شیخ لندن چ جمی تے ایڈنبرا چ پلی۔ اوہناں دی ماں اداکارہ اے تے اوہناں دے والد پہلے پاکستانی تے ایشیائی سی جیہڑے سکاٹلینڈ چ 1986 دے الیکشن چ وارڈ کونسلر چُنے گئے۔ تسمینہ احمد شیخ نے ایڈنبرا چ کریج ماونٹ ہائی اسکول، جارج ہییوٹس ہائی اسکول تے یونیورسٹی آف ایڈنبرا توں ایم۔اے، سٹراتھسلائڈ یونیورسٹی توں ایل۔ایل۔بی تے قنون چ پوسٹ گریجوایٹ ڈپلومہ حاصل کیتا۔

شوبز کیریئر سودھو

قنون چ گریجوایشن کرن توں مگروں پاکستان چ ہنی مون دے دوران اداکاری کرن دا فیصلہ کیتا۔ اوہنے پاکستانی ڈرامےآں دیس پردیس، آنسو، دی کاسٹل:ایک امید تے ماں چ اداکاری کیتی تے اوہدی اداکاری نوں پسند کیتا گیا۔

قنونی کیریئر سودھو

اوہ گلاسگو لاء فرم ہملٹن برنز چ سانجھ دار تے کاروباری دستاویز لِکھت (دستاویز انتقال) ، نجی موکل کم ، عائلی قنون تے امیگریشن امور چ خاص مہارت رکھدیاں نیں۔

سیاسی کیریئر سودھو

تسمینہ احمد شیخ سکاٹش کنزرویٹیو پارٹی چ 10 ورھے دی عمر چ سرگرم ہوگئی تے 16 ورھے دی عمر چ اوہدی ممبر بنی۔ اوہ ایڈنبرا سینٹرل ینگ کنزرویٹو دی چیئرپرسن بنی۔ اوہ عورتاں تے گھریلو ٹبریلو امور تے برابر مواقع دین دے امور لئی پارٹی دی ڈپٹی ترجمان بنی۔ اوہ 1999 دے سکاٹش پارلیمینٹری الیکشن چ پارٹی ولوں گلاسگو گوون حلقے چ امیدوار بنی پر کامیاب نہ ہو سکی ۔ 2000 چ بوجوہ کنزرویٹیو پارٹی چھڈ دتی تے کچھ چِر لیبر پارٹی چ رہن تو بعد سکاٹش نیشنل پارٹی جوائن کرلئی۔ جولائی 2012 چ یس سکاٹلینڈ ایڈوائزری بورڈ جوائن کیتا تے سکاٹلینڈ دی ازادی دے ریفرنڈم 18 ستمبر 2014 چ سکاٹلینڈ دی ازادی دے حق چ مہم چلائی۔ اوہ مئی 2014 چ یورپی پارلیمینٹری الیکشن چ سکاٹش نیشنل پارٹی ولوں امیدواری دی لسٹ چ تیسری امیدوار سی پر کامیاب نہ ہوسکی۔ مئی 2015 چ برطانوی پارلیمینٹری الیکشن چ سکاٹش نیشنل پارٹی ولوں اوچل & سائوتھ پرتھ شائر دے حلقے چ امیدوار بنی تے لیبر پارٹی دے امیدوار گورڈن بینکس نوں ہرا کے کامیاب ہو گئی تے ممبر پارلیمینٹ بنی ۔ 8 جون 2017 دے برطانوی پارلیمینٹری الیکشن چ سکاٹش نیشنل پارٹی ولوں فیر ایس حلقے وچوں ای الیکشن لڑیا پر کنزرویٹیو پارٹی دے امیدوار لَک گراہم کولوں ہار گئی۔

خیراتی کم سودھو

تسمینہ احمد شیخ عورتاں دی فلاحی تنظیم سکاٹش ایشیئن وومنز ایسوسی ایشن دی بانی تے چیئرپرسن وی اے۔ ایہ تنظیم 19 اپریل 2012 نوں شروع کیتی گئی۔ سکاٹش حکومت نے ایہدے اغاز تے £16,000 دی مالی امداد دتی۔ تسمینہ احمد شیخ نے 2015 چ ممبر پارلیمینٹ بنن توں بعد تنظیم دی ٹرسٹی دے عہدے توں استعفا دے دتا۔

اسکینڈل سودھو

جنوری 2016 چ سکاٹش اخبار ہیرالڈ نے انکشاف کیتا کہ جد تسمینہ احمد شیخ عورتاں دی تنظیم سکاٹش ایشیئن وومنز ایسوسی ایشن دی چیئرپرسن سی اوس ویلے تنظیم دی آمدنی دا صرف %3 حصہ مسحقین چ ونڈیا گیا۔ مئی 2017 چ رپورٹ ہویا کہ لاء سوسائٹی آف سکاٹلینڈ نے اوہناں انتظامی معاملات دی جانچ پڑتال شروع کر دتی اے جیہڑے اوہناں دے دور چ بحیثیت وکیل پریکٹشنر تے ٹرسٹ فنڈ چ مبینہ مالی گھپلیاں نال تعلق رکھدے نیں۔ سکاٹش نیشنل پارٹی دی لیڈر نکولا اسٹرجن نوں ڈاڈھے دباء دا سامݨا کرنا پیا کہ تسمینہ احمد شیخ نوں جون 2017 دے الیکشن چ پارٹی ٹکٹ نہ دتا جاوے تے اوہناں نوں پارٹی چوں کڈھ دتا جاوے پر سکاٹش نیشنل پارٹی دی لیڈر نکولا اسٹرجن نے تسمینہ احمد شیخ نوں پارٹی ٹکٹ نہ دین تے پارٹی چوں کڈھن توں انکار کردتا۔

نِجی جیون تے ٹبّر سودھو

تسمیہنہ احمد شیخ دی ماں ادھی چیکز تے ادھی ویلش تے والد محمد رضوی اک پاکستانی نیں جیہڑے 1960 دے دہاکے چ سکاٹلینڈ گئے۔ اداکارہ تے گلوکارہ سیما رضوی تسمینہ شیخ دی بھین نیں تے پاکستان دے ڈراما ڈائریکٹر، پروڈیوسر تے لکھاری علی رضوی اوہناں دے انکل نیں۔ تسمینہ شیخ دا بیاہ اک پاکستانی ذوالفقار شیخ نال ہویا۔ تسمینہ شیخ تے ذوالفقار شیخ دے 4 نیاݨے نیں۔ اک پُتر، جیہدا ناں سیف اے تے 3 دھی آں علیزے، شانزے تے ونیزے نیں۔

باہرلے جوڑ سودھو