بکرمی تقویم
بکرمی تقویم (پنجابی دیسی کیلنڈر) اک شمسی کیلنڈر اے ۔ ایہ جیہڑا برصغیر پنجاب وچ صدیاں توں دیسی کیلنڈر دے طور تے رائج اے ۔ ایہدی بنیاد برصغیر پاک و ہند دے شمالی حصے پنجاب اُتے قائم قدیم سلطنت دے راجا بکرماجیت نے اپݨی بادشاہت دے آغاز اُتے رکھی سی ۔ راجا بکرم / وکرم / وکرما / بکرما دت دا اصل ناں وکرما دتیا (Vikrama Ditya) سی ۔ جیہدی پیدائش 102 قبل مسیح نوں بیان کیتی جاندی اے ۔ پرمار گندھار ورسنا ( Gandharvarsena ) دا دووا ، دوجا پتر سی ۔ اس علاقے تے پہلاں اک ہور حاکم راجا ساکا نے حکومت کیتی سی جیہدی اولاد نوں ساکا کہیا جاندا اے ۔ 57 ء قبل مسیح نوں راجا بکرم جیت نے قدیم تے مضبوط ترین سلطنت شاکا دے بادشاہ شاکاس (shakas) نوں شکست دتی تے اس شکست نوں ہمیشا لئی یاد گار بݨاوݨ واسطے اک کیلنڈر دا آغاز کیتا جیہڑا کہ اج بکرمی کیلنڈر دے ناں نال موجود اے ۔ راجا بکرم جیت 117 سال تک زندہ رہیا تے 15ء نوں فوت ہویا ۔
بکرمی کیلنڈر دی بنیاد اُتے نویں کیلنڈر سودھو
بکرمی کیلنڈر تے ایہدے مہینےآں دے ناں واں اُتے مبنی بعد وچ بنائے گئے کیلنڈر بھارت ، بنگلا دیش تے نیپال وچ استعمال ہُندے نیں ۔ ایہناں کیلنڈراں وچ ہندی کیلنڈر ، نیپالی کیلنڈر ، بنگالی کیلنڈر تے نانک شاہی سِکھ کیلنڈر شامل نیں ۔ ایہ سَبھ کیلنڈر پنجابی جنتری (بکرمی کیلنڈر) توں بعد وچ مُختلِف ادوار وچ تیار کیتے گئے سی ۔ ایہناں وچ وی اوہی مہینے استعمال کیتے جاندے نیں جیہڑے پنجابی جنتری (بکرمی کیلنڈر) وچ شامل نیں ۔
ہندی کیلنڈر سودھو
ہندی کیلنڈر ، بکرمی کیلنڈر توں 135 سال بعد شروع کیتا گیا ۔ 2020 عیسوی وچ ہندی کیلنڈر دا سال 1942 سی ۔
بنگالی کیلنڈر سودھو
بنگالی کیلنڈر ، بکرمی کیلنڈر توں 650 سال بعد شروع کیتا گیا ۔ 2020 عیسوی وچ بنگالی کیلنڈر دا سال 1427 سی ۔
نیپالی کیلنڈر سودھو
نیپالی کیلنڈر ، بکرمی کیلنڈر توں 936 سال بعد شروع کیتا گیا ۔ 2020 عیسوی وچ نیپالی کیلنڈر دا سال 1141 سی ۔
نانک شاہی کیلنڈر سودھو
نانک شاہی کیلنڈر ، بکرمی کیلنڈر توں 1526 سال بعد شروع کیتا گیا ۔ 2020 عیسوی وچ نانک شاہی کیلنڈر دا سال 551 سی ۔ ایہ سِکھاں دا مذہبی کیلنڈر اے جیہڑا سکھ مذہب دے بانی گرو نانک دی پیدائش دے سال 1469 عیسوی توں شروع کیتا گیا اے ۔ ایہ کیلنڈر گرو نانک دی وفات توں بہت بعد وچ سکھ مذہبی اکابرین نے بکرمی کیلنڈر دی بنیاد اُتے شروع کیتا سی ، بکرمی کیلنڈر دے مہینےآں نوں اس کیلنڈر وچ برقرار رکھیا تے چیت نوں پہلا مہینا قرار دِتا ۔ نانک شاہی کیلنڈر نوں ترامیم کر کے باقاعدہ 1998 عیسوی وچ اپنایا گیا تے 1999 عیسوی وچ شرومنی گردوارہ پربندھک کمیٹی نے ایہ کیلنڈر جاری کر دِتا ۔
بکرمی کیلنڈر دی ترتیب سودھو
اس کیلنڈر وچ سال دے 365 دن نیں ۔ 9 مہینے 30 دن دے ، اک مہینا بساکھ 31 دن دا تے دو مہینے جیٹھ ، ہاڑھ 32 دن دے نیں ۔ اس شمسی کیلنڈر وچ سال چیت دے مہینے توں شروع ہُندا اے تے چھیکڑلا مہینا پھگݨ اے ۔
بکرمی کیلنڈر دے مہینے سودھو
| نمبر | مہینا | عیسوی مہینے |
| 1 | چیت | ادھ مارچ – ادھ اپریل |
| 2 | وساکھ | ادھ اپریل – ادھ مئی |
| 3 | جیٹھ | ادھ مئی – ادھ جون |
| 4 | ہاڑھ | ادھ جون – ادھ جولائی |
| 5 | سوݨ | ادھ جولائی – ادھ اگست |
| 6 | بھادوں | ادھ اگست – ادھ ستمبر |
| 7 | اسو | ادھ ستمبر – ادھ اکتوبر |
| 8 | کت | ادھ اکتوبر – ادھ نومبر |
| 9 | مگھر | ادھ نومبر – ادھ دسمبر |
| 10 | پوہ | ادھ دسمبر – ادھ جنوری |
| 11 | ماگھ | ادھ جنوری – ادھ فروری |
| 12 | پھگݨ | ادھ فروری – ادھ مارچ |