بورنیو

بورنیو انڈونیشیا چ واقع جگ دا تیجا سب توں وڈا جزیرہ اے ، جس دا کل رقبہ 2،92،298 مربع میل اے ۔ جزیرے دا وڈا حصہ انڈونیشیا چ شامل اے ( جہڑا چڑھدا ، دکھنی ، لہندا تے گھبلا کلیمنتان صوبے کہلاندے نیں ) جدوں کہ باقی حصہ تے ملائشیا دیاں ریاستاں سراواک تے صباح واقع نیں ، برونائی دارالسلام وی ایسے جزیرے تے واقع اے ۔

خط استوا تے واقع ایہہ جزیرہ دنیا دے گرم ترین تے سب توں بارشاں آلے علاقے چ شمار ہندا اے ، بوہتیاں بارشاں دی وجہ توں ایتھے سنگھنے جنگل پائے جاندے نیں تے نیویں علاقے دلدلی نیں ۔

جزیرے دا ناں بورینو نوآبادیاتی دور چ رکھئیا گئیا تے مقامی آبادی چ ایہہ ناں نئیں ورتئیا جاندا ۔ انڈونیشیا چ اس جزیرے نوں کلیمنتان تے ملائشیا چ چڑھدا ملائشیا آکھئیا جاندا اے ۔

بورینو دے اتلے تے اتلے لہندے چ بحیرہ دکھنی چین ، اتلے چڑھدے چ جزیرہ سولو ، چڑھدے چ بحیرہ سلیبس تے آبنائے مکسار تے دکھن چ بحیرہ جاوا تے آبنائے کریماتا واقع نیں ۔

بورینو دے لہندے چ جزیرہ نما مالے تے سماٹرا نیں ۔

بورینو دا سب توں اچّا تھاں ماؤنٹ کنابالو اے جہڑا ملائشیا دے صوبے صباح چ واقع اے ، اس دی بلندی 4095 میٹر اے ۔

جزیرے دا سب توں وڈا دریا دریائے کپواس اے جہڑا 1143 کلومیٹر لمبا اے ۔ اس دے علاوہ راجانگ ، باریٹو تے محاکم ناں دے دریا وی وگدے نیں ۔