کیتھرین مینسفیلڈ

کیتھرین مینسفیلڈ
(انگریزی وچ: Katherine Mansfield)
پیدائشی نام	(انگریزی وچ: Kathleen Mansfield Beauchamp)
جم	14 اکتوبر 1888   ویلنگٹن
وفات	9 جنوری 1923 (35 سال)
وجہ وفات	ٹی بی
مدفن	ایون قبرستان
طرز وفات	طبعی موت
شہریت	نیوزی لینڈ
عارضہ	ٹی بی
شریک حیات	جان مڈلٹن مری (۱۹۱۸–۱۹۲۳)
عملی زندگی
مادر علمی	ویلنگٹن گرلز کالج
پیشہ	لکھاری ،  روزنامچہ نگار ،  شاعر ،  نثر نگار
پیشہ ورانہ زبان	کیٹلونی ،  انگریزی
ویب سائٹ
ویب سائٹ	باضابطہ ویب سائٹ (انگریزی )
	IMDB اُتے صفحہ
باب ادب

کیتھرآئن مینسفیلڈ || (14 اکتوبر 1888 – 9 جنوری 1923)اک نیوزیلینڈی/انگریز لکھاری سی۔ اوہ نیوزیلینڈ وچ جمی تے انگلیند وج پڑھی۔

اوہ 9 ورے دی سی جدوں اوہنے پہلی کہانی لکھی۔ لوکاں دے آپسی ساک تے سماجی پدھراں دی اونچ نیچ اوہدیاں کہانیاں وچ دسدی اے۔

اَدبی دُنیا وچ کہانی دے کھیتر وچ کیتھرین مینسفیلڈ دے ذکر توں بغیر کہانی دی تواریخ کدے مکمل ای نہیں ہو سکدی۔کسے ویلے وچ ”گُڈی گھر“The Dolls'houseانگریزی دے نصاب وچ شامل سی تے ایہ کہانی پڑھن والیاں نوں سارا جیون چیتے وچ رہندی سی فیر جدوں نصاب نوں بدلیا گیا تاں ایہ کہانیکارا نوں وی نصاب وچوں کڈھ دتا گیا۔شدید جذباتی لمحیاں نوں بیاننا تے طبقاتی ونڈ نوں کہانی داموضوع بنانا کیتھرین مینسفیلڈ دی پچھان بن گئی سی اوس نے صیغہء غایب وچ لکھدیاں ہویاں اوہ سوکھت محسوس کردیاں نیں۔

جیون

چار اکتوبر1888نوں ولینگٹن نیوزی لینڈ وچ جنمی۔آپ دے والد داناں ہیرولڈ سی جو بینک آف نیوزی لینڈ دا چئیرمین وی رہیا سی آپ دی ماں دااینی برنیل سی۔کیتھرین مینسفیلڈ دیاں دو وڈیاں بھیناں سن جد کہ اک بھین تے اک بھرا نِکے سن۔ولینگٹن گرلز ہائی سکول نیوزی لینڈ توں وکھ کوئینز کالج لندن وچوں تعلیم حاصل کیتی۔کیتھرین مینسفیلڈ ستارھاں ورھیاں وچ ٹی بی دی جان لیوا بیماری دی شکار ہوگئی تے اُنی ورھیاں دی عمر وچ انگلینڈ چلی گئی،فیرکوئینز کالج لندن وچ جا کے وی اپنیاں بھیناں نال پڑھنا شروع کردتا تے ”سیلو“وجاون وچ اپنے آپ نوں مصروف رکھنا چاہیا پر اپنے آپ نوں لکھن ول لالیا۔کیتھرین مینسفیلڈ دی پہلی کہانی ”اوہدا نِکا مِتر“1898 نیوزی لینڈ گرافک اینڈ لیڈیز جرنل وچ چھپی۔1903توں 1906وچ یورپ دے سفر کیتے، بیلجیم تے جرمن دیاں یاترا توں بعد کہانیاں لکھنا شروع کردتیاں۔ کیتھرین مینسفیلڈ نے اپنے توں یارھاں ورھے وڈے جکارج باؤڈن نال ویاہ کیتا جہڑا طلاق دی صورت وچ مُک گیا۔ گارنیٹ نال وی جسمانی سنبندھ رہے جوایس طلاق توں بعد وی جاری رہے۔اِیڈا بیکر ناں دی سوانی نال وی گارنیٹ والا ای تعلق رہیا جو سارا جیون اوس نال جُڑی رہی اوہ اوس نوں ”میری پتنی“ دے ناں نال یاد کردی اے۔ایس دے نال نال فرانسس کارکو نال وی تھوڑا چِر تعلق رہیا فیر مُک گیا۔مورے نال کیتھرین مینسفیلڈ دا ویاہ ہویا جو ”The athenum ناں دے میگزین دا ایڈیٹر سی جہدے وچ کیتھرین نے سو توں ودھ کتاباں اُتے اپنے وچاروٹاندرے نوں وی اُلیکیا۔

کیتھرین نے اپنے ویاہتا جیون بارے اِک کہانی وی لکھی جس دا سرناواں سیThe man without a temprament جہدے وچ بیمار بُڈھی تے ورھیاں توں بیماری نال جھُوجھ رہے بندے دی کہانی اے۔آپ دے بارے لکھن والیاں نے آپ دیاں کہانیاں اُتے چیخوف دا اثر دسیا اے۔In a german pensionپہلا کہانی پراگا اے جو1911وچ ساہمنے آیا بعد وچ کیتھرین مینسفیلڈ نے ایس نوں ”امیچور“ کہہ کے پرانہ کردتا۔1920وچ Blissناں دا کہانی پراگا تے ایس توں دو ورھیاں مگروں The Garden party and other stories ساہمنے آئی۔ٹی بی داعلاج کروان واسطے کیتھرین سویٹزر لینڈ گئی تے اوس دے نال ایڈا بیکر وی سی ایسے ای ملک وچ رہندیاں بڑیاں انملیاں کہانیاں لکھیاں Acup of tea.The Dolls'house.The garden party.At the bayایہ ای اوہ کہانیاں نیں جو سویٹزر لینڈ وچ لکھیاں سن۔1922وچ پیرس گئی تے اوتھے جاون دا مقصد وی علاج ای سی جد کہ ایتھے علاج نال صحت اُتے بھیڑے اثرات پئے۔ایتھے ای ست جولائی نوں ہوٹل وچ ای اپنے جیون وچ آخری کہانی لکھیThe canaryکیتھرین دی صحت خراب ہوندی گئی تے چڑھدے ورھے ست جنوری1923نوں ایہ کہانیکارا اگلے جہان ٹُر گئی۔مورے نے کیتھرین دی وفات توں بعد اوس دیاں لکھتاں نوں کتابی صورت وچ شایع کر دتا،1923وچ The dove 's nestتےSomething childish۔

”خلیج اُتے“ کہانی وچ کرداراں دی نفسیات نوں وی بیانیا ات بیرل تے مسز ہیری دی کہانی اے جہدے

وچ لِنڈا بیرل دی کہانی وی نال نال رکھی اے۔دوجیاں سوانیاں مسز ہیری نوں ’تیز‘ سمجھدیاں نیں جو مرداں وچ اوہناں ورگی ای ہوجاندی اے تے باقی کرداراں نوں کئی بھلیکھے وچ پا دیندی اے۔The garden partyوچ شیریڈن پروار دی کہانی اے جہناں دے گھر دے باغ وچ پارٹی چل رہی سی تے اوتھے خبر آندی اے کہ ماڑے گھر دا اک جی سڑک حادثے وچ ماریا گیا اے تاں پارٹی نوں بند کرن دامشورا دتا جاندا اے کیوں جے کجھ گھراں دے فاصلے تے ماتم ہووے تے اک گھر باغ اندر پارٹی چل رہی ہووے کسے وی سوچن سمجھن والے نوں وارا نہیں کھائے گا۔ایس کہانی وچ کیتھرین مینسفیلڈ نے وکھ وکھ طبقے کویں دا جیون لنگھا رہے نیں ایس نوں موضوع بنایا اے۔

کیتھرین مینسفیلڈ دیاں آکھیاں گلاں

کیتھرآئن مینسفیلڈ
جیون:	(14 اکتوبر 1888 – 9 جنوری 1923)
جمن پو :	ویلنگٹن نیوزیلینڈ
کم:	نکی کہانی لکھاری

٭میں پہلے لیکھک آں تے بعدوں سوانی۔

٭تُوں مینوں میری روح نال ملوا دِتا اے۔

٭جے تُسیں جینا چاہندے او تے سبھ توں پہلاں اپنا جنازا آپ پڑھ لو۔

٭ تُوں ملکہ ایں تے مینوں تیری سلطنت تینوں دین دے۔

٭جیوندے رہنا تے ’لیکھک‘ ہوونا بس میرے واسطے کافی اے۔

٭اوہ کِنی سوہنی لگدی اے پر کوئی کسے نوں ویکھدا ای نہیں اے۔

٭اسمان دے باہر تاریاں دے نال روشنی وی کھلری اے۔

٭مینوں اجہے ٹیلی گرام توں بھے آندا اے جہدے وچ پُچھیا گیا ہوندا اے کہ میری طبعیت کیسی اے میں ہر وار جواب دینی چاہنی آں کہ موئی ہوئی۔

٭ڈر نوں سمجھن لئی ضروری اے کہ اک وار ہار ای جاؤ۔

٭محبت نال ساری دُنیاای ساڈی ہوجاوے گی۔

٭تیرے نال میں دُنیاوی جِت سکدی آں۔

٭جدوں اسیں گھر پرتے تاں تیریاں گلھاں گلاب سن تے اکھاں تاریاں ہار چمکیلیاں تے توں اِکو ساہے سبھ کجھ اپنی ماں نوں دسنا چاہیامینوں لگیا توں جیویں پھَٹ ای جاویں گی۔

٭کیہ تُوں اج میری چِٹھی وچ پریم بھالیا ایہ کسے پنچھی دے آلھنے ہار اے۔

٭ایہ تیری غلطی اے نہ ای سوچ ایہ بس مقدراں دی کھیڈ اے۔

٭سیموئیل جوزف اک پروار نہیں سی اوہ کیڑے مکوڑے سن۔جویں ای تُسیں اوہناں دے گھروچ وڑدے او اوہ میزاں ہیٹھوں،پوڑھیاں کولوں،بوہیوں پِچھوں،راہ وچ ٹنگے کوٹاں توں تہاڈٖے اُپر ای اُچھلن لگ پیندے نیں جہناں نوں گِننا تے اوہناں وچکار فرق بھالنا بہت ای اوکھا اے۔

٭پَتیاں تے گِلی مٹی دی خشبو سورج دی تیز خشبو وچ رَل گئی سی۔

٭میرا پیار،میرے پیارے میں دوجی دُنیا وچ جینی آں۔اِک رحم دل تے سادا دُنیا۔چن تاریاں تے جنگلاں والی دُنیا جہدے جادوئی سہپن تے خوف اے۔ایہ پرانی دُنیااے پر میرے واسطے اُکاای نویں دُنیااے،میرے پیارے تُوں اُکاای نہ ڈر مینوں ایہ پسند اے۔

٭کلّے رہنا بہت بھیانک اے۔

٭میں اپنے جیون دا اِک اُصول بنالیا اے کہ نہ کدے پچھتانا اے تے نہ ای کدے مُڑ کے ویکھنا اے۔

٭جدوں کدے میں سفر لئی تیاری پھڑنی آں میں موت لئی تیار ہو رہی ہونی آں۔

٭میرے لئی دُنیا سُفنا اے تے دُنیا واسی نیندر مان رہے نیں۔

٭کیہ تُسیں ہر قسم دی حیاتی نہیں جیونا چاہو گے۔۔۔اِک تاں بہت ای نِکی اے۔۔۔پر لکھن دی تاں تسلی اے۔۔۔کوئی وی بہت ساریاں حیاتیاں دی نقالی کر سکدا اے۔

٭کم کردیاں ایہ ڈھیر خُشی ملدی اے کہ حالے بہت کجھ چنگا کیتا جاسکدااے۔

ہورویکھو

حوالے

باہرلےجوڑ