کجلی

کجلا یا کجلی، بھیڈاں دی اک نسل اے، جیہدا تعلق پنجاب، پاکستان توں اے۔ ایہدی افزائش بنیادی طور تے پنجاب دے سرگودھا تے ہور علاقیاں گجرانوالا، لہور، فیصل آباد تے گجرات وچ ہُندی اے۔ ایہ نسل بنیادی طور تے اُنّ، گوشت تے دُدھ لئی پاݪی جاندی اے۔ ایہ نسل چھوٹی عمر وچ نمایاں طور تے موٹی تے وڈی ہو سکدی اے۔

ایہ پنجاب دے کجلے لیلے دی خالص نسل دی تصویر اے

آبائی علاقہ

پنجاب دے اضلاع سرگودھا، خوشاب، میانوالی، گجرات، فیصل آباد تے گجرانوالا ایہدے آبائی علاقے وچ شامل نیں۔

خواص

ایہ لمبیاں لتاں آݪیاں تے گوشت ناݪ بھرپور بھیڈاں نیں۔ ایہناں دیاں لتاں تے گردݨ اُتے چِٹی اُنّ ہُندی اے۔ ایہناں دے اُتلے بُلھ تے کناں دا تھللا حِصا کاݪے رنگ دا ہُندا اے۔ ایہناں بھیڈاں دی خاص پچھاݨ ایہناں دیاں اکھاں دے دواݪے کاݪے حلقے نیں جیہناں دی وجہ توں ایہناں نوں کجلے کہیا جاندا اے۔ نک لمبا تے کھڑا تے سینہ چوڑا، لمبے لٹکے ہوئے کن، وڈا سر، چھوٹی پتلی پونچھ ایہناں دیاں نسلی امتیازی خصوصیات نیں۔ نر دا وزن 55 کلوگرام تے مادہ دا وزن 45 کلوگرام ہُندا اے۔ اُنّ دی پیداوار فی جانور 3 کلوگرام سالانا اے۔ اُنّ دے ریشے دا قطر 37 مائیکران ہُندا اے۔ ایہ بھیڈاں اُنّ تے گوشت دے حصول لئی پاݪیاں جاندیاں نیں۔ خوبصورت تے پُرکشش ہوݨ دی وجہ توں عید الضحا اُتے ایہ جانور بہت زیادہ فروخت ہُندے نیں۔