چیف سیکرٹری پنجاب

چیف سیکرٹری پنجاب (انگریزی: Chief Secretary Punjab)، جیہنوں سی ایس پنجاب وی کہیا جاندا اے، بیوروکریٹک چیف تے پنجاب حکومت دا سَبھ توں وڈا سرکاری عہدے دار اے۔ چیف سیکرٹری دی تقرری براہ راست وزیراعظم پاکستان کردا اے۔ چیف سیکرٹری دا عہدا وفاقی سیکرٹری دے عہدے دے برابر ہُندا اے تے پوزیشن ہولڈر دا تعلق عمومن پاکستان ایڈمنسٹریٹو سروس توں ہُندا اے۔

چیف سیکرٹری صوبے دا اِنتظامی سربراہ ہُندا اے کیونکہ سارے ڈویژنل کمشنرز تے صوبے دے انتظامی سیکرٹریز، اوہنوں رپورٹ کردے نیں۔ چیف سیکرٹری وزیر اعلا پنجاب نوں رپورٹ کردا اے، پَر چیف سکریٹری وزیر اعلا دے چارج دے تحت نئیں، کیونکہ صِرف وزیراعظم ای چیف سیکرٹری نوں عہدے اُتے تعینات کر یا ہٹا سکدا اے۔ چیف سیکرٹری، چیف منسٹر دے چیف ایڈوائزر تے صوبائی کابینا دے سیکرٹری دے طور تے وی کم کردا اے۔