پنجابی زبان تحریک
(پنجابی بولی لہر توں مڑجوڑ)
پنجابی زبان تحریک پنجابیاں ولوں پنجابی زبان نوں پاکستانی پنجاب وچ پڑھائی تے سرکاری پدھر اُتے لاگو کرن دی تحریک اے۔ پنجابی سوجھوان، پنجابی سیوک، پنجابی لکھاری، پنجابی پڑھیار تے پنجابی تنظیماں ایہنوں اگے ودھا رہیاں نیں۔ پاکستان وچ پنجابی زبان نوں سرکاری ریاستی جبر دے تحت دباؤݨ دا دانستا سلسلا قیام پاکستان توں ای شروع ہوگیا سی جیہڑا ہُݨ تک جاری اے پَر ہُݨ اس ریاستی جبر تے پنجابی دشمݨی دے خلاف عام پنجابیاں وچ وی شعور پیدا ہوگیا اے۔
- پنجاب دے تعلیمی، سرکاری تے عدالتی نظام وچ پنجابی زبان نوں سرکاری تحفظ دیݨ تے لاگو کرن لئی، ایہدی ترقی لئی ادارے قائم دی غرض نال پنجاب اسمبلی وچوں پنجابی بولی ایکٹ منظور کیتا جاوے تے قانون سازی دے ذریعے اکثریتی پنجابی زبان نوں پنجاب دی تعلیم، حکومت، انتظامیہ ،عدلیہ تے مقننہ دی زبان قرار دتا جاوے۔
- پنجابی زبان نوں پنجاب دی مڈھلی تعلیمی، سرکاری تے عدالتی زبان دے طورتے عملن نافذ کیتا جاوے۔ پنجاب وچ پنجابی زبان وچ تعلیم دیݨ اُتے لگی ریاستی پابندی ختم کیتی جاوے تے پنجابی بالاں نوں اپݨی ماں بولی پنجابی نہ پڑھا کے چلدی لسانی تے ثقافتی برین واش کرن تے پنجابیاں دیاں موجودہ تے آؤݨ والیاں نسلاں نوں لسانی طور تے بدلن دی خوفناک سرکاری مہم تے سازش بند کیتی جاوے۔
- پنجاب اسمبلی اپنی سرکاری، غیر سرکاری کاروائی تے لکھت پڑھت تے گل بات لئی مکمل طور پنجابی زبان اختیار کرے، نالے پنجاب اسمبلی وچ سپیکر کولوں پہلاں اجازت لے کے پنجابی وچ بولن تے تقریر کرن دی غیر اخلاقی، غیرآئینی تے غیرقانونی پابندی ختم کیتی جاوے تے پنجاب دے سرکاری دفتراں ، عدالتاں ہر تھاں پنجابی لوکاں نوں ہر طرحاں دیاں خدمتاں پنجابی زبان وچ دتیاں جاݨ۔
- پنجابی زبان، ادب تے ثقافت دے ودھاء لئی پنجابی یونیورسٹی ،پنجابی لینگوئج اتھارٹی، پنجابی لینگوئج ٹیکسٹ بک بورڈ، پنجابی اکیڈمی، پنجاب یونیورسٹی وچ پنجابیالوجی ڈیپارٹمنٹ، پنجاب دے ہر وڈے شہر وچ پنجابی کلچرل سینٹرز، پنجابی ٹی وی چینل بݨائے جاݨ۔
- پنجاب دیاں سڑکاں، چوکاں، بازاراں دے سارے غیر مقامی ناں بدل کے قدیم تے جدید پنجابی حوالیاں تے شناختاں دے حوالے نال رکھے جاݨ۔
- وفاقی تے صوبائی سرکاراں تے پرائیوٹ سیکٹر، پرنٹ تے الیکٹرانک میڈیا پنجاب لئی اشتہار پنجابی زبان وچ جاری کرن دی پالیسی اپناؤݨ۔ پنجابی ماں بولی دے ودھاء لئی پنجابی اخباراں تے رسالیاں نوں ودھ توں ودھ اشتہار دتے جاݨ۔
- 1951 ،961، 1972، 1981، 1998، 2017 وچ ہوݨ والیاں مرد م شماریاں وچ پاکستان دے ریاستی اداریاں وچ لُکیاں کالیاں بھیڈاں نے منظم سازش دے تحت پنجابی بولݨ والی آبادی دی گݨتی تے پنجاب دی آبادی بہت تیزی نال گھٹ کردتی اے تے پنجابی زبان دے لہجیاں نوں الگ زباناں قرار دے کے اوہناں دے وکھرے خانے بنا دتے نیں۔ ریاست پاکستان پنجابی زبان بولݨ والی آبادی تے پنجابی دی آبادی گھٹ کرن دیاں سازشاں تے پنجابی زبان دے لہجیاں دی بنیاد تے ٹکڑے کرن دیاں سازشاں تے شر انگیزیاں توں باز رہوے۔
- نادرا پنجابی زبان وچ شناختی کارڈ جاری کرنا شروع کرے۔ شناختی کارڈ دے کمپیوٹرائزڈ درخواست فارم وچ پنجاب دے لوکاں دی مادری زبان پنجابی لکھے۔ پنجابی لوکاں نوں بغیر دسے پُچھے یا دھوکھے نال زبردستی اوہناں دے مادری زبان دے خانے وچ پنجابی دی تھاں کوئی ہور زبان لکھݨ دا بھیانک جرم تے قانونی شکنی بند کرے۔ نادرا نے جیہناں شناختی کارڈاں دے ریکارڈ وچ پنجابی لوکاں دی ماں بولی پنجابی دی بجائے کوئی ہور زبان لکھی اے تے اوہناں سارے شناختی کارڈاں دے ریکارڈ وچ پنجابی زبان درج کیتی جاوے۔ پنجابیاں دی ماں بولی بدلݨ تے پنجاب وچ پنجابیاں نوں اقلیت وچ بدلݨ دی ہر کوشش تے سازش بند کیتی جاوے۔
- پنجاب وچ دہرا تعلیمی نظام مکایا جاوے۔ پنجاب وچ بے روزگاری تے ان پڑھتا مکاون لئی غریب پنجابی بالاں نوں پرائمری توں لے کے میٹرک تائیں ساری تعلیم ماں بولی پنجابی وچ مفت دتی جاوے۔
- پنجاب دے تمام تعلیمی اداریاں وچ پنجابی زبان دیاں کلاساں لئی مطلوبہ گݨتی وچ پنجابی استاد بھرتی کیتے جاݨ تے پڑھے لکھے تے بے روزگار پنجابی استاداں نوں فوری طور تے ملازمتاں دتیاں جاݨ۔
- پنجاب حکومت پنجاب دی جی ڈی پی دا وڈا حِصا پنجابی زبان، ادب، پنجابی دی تعلیم تے پنجابی ثقافت دے ودھاء لئی مُختص کرے۔ پنجابی زبان تے ادب دے ودھاء لئی پنجابی انسٹیٹیوٹ دے بورڈ آف ڈائریکٹرز وچ سینئیر پنجابی سوجھواناں، کھوجکاراں تے لکھاریاں نوں شامل کیتا جاوے۔
- پنجابی بزنس کمیونٹی اپݨی ماں بولی دا قرض اتارے۔ پنجابی ماں بولی دے ودھاء لئی پنجابی چینل، ایف ایم ریڈیو تے پنجابی اخبار شروع کرے تے اردو انگریزی میڈیا دے پنجابی مالکان اپݨے ٹی وی چینلز تے اخبارات وچ پنجابی زبان نوں وی جگہ دیݨ۔ غیر پنجابی میڈیا پنجاب دے سازشاں کرہیا اے تے تعصب پھیلا رہیا اے، اوہناں متعصب میڈیا ہاؤسز نوں اشتہار دیݨا بند کیتا جاوے تے اوہناں دا معاشی بائیکاٹ کیتا جاوے۔
- غیر ملکی قونصلیٹ پنجابی زبان تے ثقافت بارے سیکشن کھولݨ تے سمندر پار پنجابیاں نوں پاکستان دے سفارتخانے دے سفارتی عملہ پنجابی زبان وچ خدمات فراہم کرے۔
- پنجابی رہتل دیہاڑ، وساکھی تے پنجابی زبان دیہاڑ نوں پنجاب حکومت سرکاری سرپرستی وچ مناوے۔
- پنجاب دے ٹکڑے کرن دیاں مکروہ سازشاں کرن والی اندرون سندھ دی سندھی قوم پرست، پنجاب دشمݨ جماعت پیپلزپارٹی نوں پنجاب وچ کالعدم قرار دتا جاوے تے پنجاب وچ الیکشن لڑن توں روکیا جاوے۔ اس شر انگیز، متعصب سندھی پارٹی نے 1971 وچ اکثریتی بنگالی قوم دے خلاف سازشاں کرکے اقتدار دے لالچ وچ پاکستان نوں توڑیا سی، ہُݨ اک واری فیر اوہی پراݨا کھیل کھیلدے ہوئے اقتدار دے لالچ وچ اکثریتی پنجابی قوم تے پنجاب دے خلاف سازشاں کر رہی اے۔
- پنجاب دیاں زرعی زمیناں پناہ گیر بلوچ، مخدوم تے ہور غیر مقامی وڈیریاں کولوں ضبط کرکے غریب کاشتکاراں وچ ونڈیاں جاݨ۔
- پنجاب تے پنجابی زبان نوں ختم کرن تے پاکستان توڑن لئی سامراجی گماشتے پنجاب دی ونڈ دیاں سازشاں کررہے نیں۔ پنجاب دی لسانی یا انتظامی ونڈ دے پِچھے پاکستان توڑن لئی پنجاب وچ نسلی تے لسانی خانہ جنگی کروان دی ڈونگھی سازش اے۔ اس سازش نوں ریاست پاکستان تے اوہدے سلامتی دے ادارت سختی نال روکن ورنہ نقصان پاکستان دا ای ہوݨا اے۔ پنجاب نوں اکٹھا رکھے بغیر پاکستان نوں اکٹھا تے باقی نئیں رکھیا جا سکدا۔