پارتھینون

پارتھینون یونانی دیوی ایتھنا دا مندر اے ،جسنوں یونان دے موجودہ راجگھر ایتھنز دے مشہور زمانہ ایکروپولس چ 5ویں صدی قبل مسیح چ اسارئیا گئیا ۔ ایہہ قدیم یونانی عمارتاں چوں سب توں بہتر حالت چ اے ۔ اس چ موجود بت یونانی آرٹ دے عروج دی کہانی دسدے نیں ۔ سب توںو دھ سیاحاں نوں اپنے ول کھچن آلا پارتھینون ، قدیم یونان تے ایتھنز دی جمہوریہ دی علامت تے جگ دیاں وڈیاں ثقافتی یادگاراں چوں اک اے ۔ یونانی وزارت ثقافت اس دی بحالی دے منصوبے تے کم کر رہی اے ۔

لہندے پاسےاوں پاتھینون دی مورت

پرانا پارتھینون 480 ق م چ فارسیاں دے حملے چ تباہ ہو گئیا سی ، جس دے مگروں موجودہ پارتھینون نوں اس پرانے مندر دی تھان اسارئیا گئیا ۔ سارے یونانی مندراں وانگ پارتھینون وی خزانے دے طور تے ورتیا جاندا سی ۔ 6ویں صدی عیسوی چ پارتھینون عیسائی گرجے چ بدل دتا گئیا ۔ 1460ء چ سلطنت عثمانیہ دے ہتھوں ایتھنز تے یونان دی فتح دے بعد اسنوں مسیت چ بدل دتا گئیا ۔ 28 ستمبر 1687ء چ عثمانیاں دے اسلحہ خانے چ دھماکے نال پارتھینون نوں شدید نقصان پہنچئیا ۔ 1806ء چ تھامس بروس عثمانیاں دی اجازت نال بچن آلے مجسمے اپنے نال لے گئیا ۔ ایہہ مجسمے 1816ء چ برٹش میوزیم لندن نوں ویچے گئے ، جتھے ایہہ اج وی موجود نیں ۔ یونانی حکومت اینہاں مجسمےآں دی واپسی دا مطالبہ کردی رہی اے پر حالے تیکر اسنوں کوئی کامیابی نئیں ملی ۔

امریکی ریاست ٹینینسی دے شہر نیش ویلے چ اساری گئی پارتھینون دی نقل

عثمانیاں نے اس عمارت چ اک مینار وی شامل کیتا سی تے 17ویں صدی دے یورپی سیاحاں نے وی اپنیاں کتاباں چ لکھئیا کہ عثمانیاں نے اپنی رواتاں نوں برقرار رکھدے ہوئے پارتھینون سمیت کسے وی آثار قدیمہ نوں کوئی نقصان نئیں پہنچائیا تے ایہ بالکل بہترین حالت چ نیں ۔

1975ء چ یونانی حکومت نے یورپی یونین دی مالی تے تکنیکی تعاون نال پارتھینون تے ایکروپولس دی کئی دوجیاں عمارتاں دی بحالی دے منصوبے دا آغاز کیتا ۔

اس ویلے ایتھنز دے آثر قدیمہ نوں سب توں ودھ خطرہ 1960ء دی دہائی توں ہن تک پھیلے ہوئے شہر دی آلودگی توں اے ۔ اس دی سنگ مرمر تیزابی بارش تے گڈیاں دے دھوئیں دی وجہ توں شدید متاثر ہو رہئیااے ۔

متحدہ امریکی ریاستاں دی ریاست ٹینیسی دے شہر نیشویل چ اصل پارتھینون ورگی عمارت بنائی گئی اے ،ایہہ عمارت 1897ء چ تعمیر ہوئی ۔