مائیاں

مائیاں پنجابی بیاہ دی اک رسم اے۔ پہلے سمیاں وچ بیاہے جاݨ آلے منڈے کڑی دی خوراک دا بہت خیال رکھیا جاندا سی۔ ادوں ددھ گھیو توں ای بندے صحت مند ہندے سن تے ددھ گھیو نال بندی پنجیری طاقتور منی جاندی سی۔ سری کہل دے شبداں وچ ایس طرحاں منڈے کڑی دے بیاہ دے دن دھرݨ مگروں گھر والے تے رشتے دار پنجیری رلا کے منڈے کڑی نوں کھاݨ نوں دیندے سن۔ ایس پنجیری نوں مائیاں آکھیا جاندا سی۔ پہلاں مائیاں منڈے کڑی دے نانکے بھیجدے سن۔ پھیر بھوآ بھیجدیاں سن۔ ماسیاں بھیجدیاں سن۔ گھر آلے دی پنجیری تاں ہندی ای سی۔ جیس دن منڈے کڑی دا بیاہ دا دن طے کیتا جاندا سی، اوسے دن توں منڈے کڑی نوں مائیاں پیا کیہا جاندا سی۔” ایس پنجیری نوں وی مائیاں کیہا جاندا اے۔ بیاہ توں پہلاں وٹنا ملݨ دی رسم نوں وی مائیاں کیہا جاندا اے۔

مائیاں بارے اک لوک گیت

 
سچ دسیں میرے لاڈ لڈکیا،
پہلا مائیاں تینوں کہدے؟
دادی سو پتی، بابا سو دھرمی،
پہلا مائیاں مینوں اوہدے نی بھیݨو۔
سچ دسیں میرے لاڈ لڈکیا،
پہلا مائیاں تینوں کہدے؟
ماں سو پتیں، پیو سو دھرمی،
پہلا مائیاں مینوں اوہدے نی بھیݨو۔
سچ دسیں میرے لاڈ لڈکیا،
پہلا مائیاں تینوں کہدے؟
چاچی سو پتی، چاچا سو دھرمی،
پہلا مائیاں مینوں اوہدے نی بھیݨو۔
سچ دسیں میرے لاڈ لڈکیا،
پہلا مائیاں تینوں کہدے؟
تائی سو پتی، تایا سو دھرمی،
پہلا مائیاں مینوں اوہدے نی بھیݨو۔
سچ دسیں میرے لاڈ لڈکیا،
پہلا مائیاں تینوں کہدے؟
بھرجائی سو پتی، ویرا سو دھرمی،
پہلا مائیاں مینوں اوہدے نی بھیݨو۔

حوالے