[[File:Antiochmap2.PNG|thumb|250px|left|اج دے [[ترکی]] چ انطاکیہ دا محل وقوع]]
انطاکیہ جنوب مغربی [[ترکی|ترکی]] دا اک شہر تے [[صوبہ حطائے|صوبہ حطائے]] دا صدر مقام اے ، جہڑا [[بحیرہ روم|بحیرہ روم]] توں 20 [[کلومیٹر]] دور [[دریائے آسی|دریائے آسی]] دے کنارے واقع اے ۔ سنہ 2000ء دی مردم شماری دے مطابق شہر دی آبادی 144190 اے ۔
ایہہ شہر چوتھی صدی [[قبل مسیح]] چ [[سکندر اعظم|سکندر اعظم]] دے اک جرنیل [[سلیوکس اول|سلیوکس اول]] نے قائم کیتا سی ۔ 638ء چ [[بازنطینی سلطنت]] دے [[شہنشاہ]] [[ہراکلس|ہراکلس]] دے دور حکومت چ ایہہ شہر مسلماناں نے فتح کرلئیا ، پر اوہ [[اناطولیہ|اناطولیہ]] چ زیادہ اگے نا جا سکے ، تے انطاکیہ دی حثیت 2 عظیم سلطنتاں دے درمیان اک سرحدی قصبے ہوگئی ، جہڑا اگلے 350 سال تک دوناں سلطنتاں دے ٹکراؤ دا نشانہ بن دا رہیا ۔
سنہ 969ء چ [[مائیکل بوزرا]] تے [[پیٹر دی یونوچ]] نے اسنوں دوبارہ [[بازنطینی سلطنت|بازنطینی سلطنت]] چ شامل کرلئیا ۔ 1084ء چ سلجوقیاں ([[سلطنت روم]]) نے اس شہر نوں فتح کیتا پر ایہہ صرف 14 سال اینہاں دے قبضے چ رہیا تے [[صلیبی جنگاں|صلیبی جنگاں]] شروع ہوگئیاں ۔ [[پہلی صلیبی جنگ]] دے دوران عیسائیاں نے اس شہر دا 9 مہینے لمبا محاصرہ کیتا تے شہر تے قبضہ کرکے ساری [[مسلمان]] آبادی نوں قتل کردتا ۔ اس عظیم قتل عام دے بعد شہر نوں عیسائی [[امارت انطاکیہ|امارت انطاکیہ]] دا صدر مقام قرار دتا گئیا تے اگلیاں 2 صدیاں تک ایہہ شہر عیسائیاں دے قبضے رہیا تے بالآخر 1268ء چ [[مملوک|مملوک]] [[سلطان]] [[رکن الدین بیبرس|رکن الدین بیبرس]] نے انطاکیہ فتح کرکے صلیبیاں دا خاتمہ کردتا تے بعد چ ایہہ شہر [[سلطنت عثمانیہ|سلطنت عثمانیہ]] دا حصہ بنیا ۔
[[File:AntiochRamparts.jpg|thumb|150px|left]]
[[File:Capture_of_Antioch_by_Bohemond_of_Tarente_in_June_1098.JPG|thumb|250px|left|[[جون]] 1098ء چ [[ٹرانٹو]] دے بوہیمنڈ دا انطاکیہ تے مل]]
[[جنگ عظیم اول]] تے [[ترک جنگ آزادی|ترک جنگ آزادی]] دے بعد [[ترک]] جمہوریہ قائم ہوئی ۔ اس وقت ایہہ شہر [[فرانس|فرانس]] دے زیر انتظام [[شام|شام]] چ شامل سی ، پر ترکاں دا ایہہ دعوی سی کہ ایہہ [[ترکی]] دے علاقے نیں ۔ ایتھے دی آبادی [[ترک|ترک]] ، [[عرب|عرب]] تے ارمنی باشندیاں تے مشتمل سی ، پر ترکاں دی تعداد سب توں ودھ سی ۔ [[شام]] وی اس علاقے دا دعویدار سی ۔ اس اختلاف دی وجہ توں انطاکیہ تے [[اسکندرون|اسکندرون]] دے علاقییاں چ [[مئی]] 1937ء چ اک نیم خودمختار حکومت قائم کردتی گئی ۔ اس حکومت دی منتخب مجلس دے 40 چوں 22 ارکان [[ترک]] سن ، اس مجلس نے اتفاق رائے نال [[ترکی]] نال الحاق دا فیصلہ کیتا تے 23 [[جولائی]] 1939ء چ ایہہ دونے ضلعے ترکی چ شامل ہوگئے ۔ ترک حکومت نے انطاکیہ دا ناں بدل کے [[حطائے|حطائے]] رکھ دتا پر ایہہ اج وی انطاکیہ دے ناں نال مشہور اے ۔
