واڑا
واڑا، ڈنگراں نوں رکھݨ لئی اک احاطہ یا مخصوص تھاں ہُندا اے۔ واڑے وچ چھتیا ہویا تھاں وی ہُندا اے۔ واڑے دے اِرد گِرد کندھ، باڑ یا جنگݪا لاکے حَد بندی کیتی جاندی اے تے اوہنوں محفوظ کیتا جاندا اے۔ وڈے پیمانے اُتے ڈنگر پالݨ تے ڈیری فارمنگ لئی واڑا اک بنیادی ضرورت اے۔ اصطبل، مرغی خانہ، تے چڑیا گھر وی اپݨے مقاصد تے نوعیت دے لحاظ ناݪ واڑے دیاں ہی شکلاں نیں۔
واڑا لائیو سٹاک توں علاوہ دوسرے پالتو جانوراں نوں رکھݨ لئی وی ورتیا جاندا اے جیہناں نوں گھر وچ کُھلے عام رکھݨا پسند نئیں کیتا جاندا۔ تعمیرات، مقصد، محدود رہݨ آݪے جانوراں دی انواع، استعمال شدہ مقامی مواد تے روایت دے لحاظ ناݪ واڑے دی اصطلاحات، دُنیا دے مُختلف خِطےآں وچ مُختلف ہوسکدیاں نیں۔ اک فعل دے طور تے واڑا بندی اک مخصوص تھاں وچ جانوراں نوں محدود کرکے رکھݨ دا عمل اے۔ واڑا زمین دا اک کُھلا تھاں اے جیہڑا کِسے عمارت یا عمارتاں دے اک گروپ ناݪ جُڑیا ہُندا اے۔