لونا 1 پہلی خلائی گڈی (spacecraft) سی جیہڑی چند دے نیڑے پہنچی ایس نوں میچتا (روسی زبان وچ مطلب سفنہ) دے ناں وی دتا گیا۔ ایہہ سویت یونین دے خلائی پروگرام دی پہلی خلائی گڈی سی جیہڑی کامیابی نال چند دے پاسے بھیجی گئی۔ لونا دا مطلب روسی زبان وچ چند اے۔ لونا 1 دے ذریعے دریافت ہویا کہ چند دا اپنا کوئی مقناطیسی میدان نئیں تے پہلی وار شمسی ہوا(solar wind) دا سیدھا مشاہدا کیتا گیا۔ لونا 1 نال پہلی واری 5 لکھ کلومیٹر دور ریڈیو مواصلاتی رابطہ کیتا گيا۔ زمینی کنٹرول سسٹم وچ خرابی پیدا ہون دی وجہ نال راکٹ دے جلن دے وقت (burn time) گڑبڑ ہوگئی تے خلائی گڈی نے اپنا ہدف چھڈ دتا تے چند توں 5900 کلومیٹر دی دوری تے پرواز کیتی اینج ایہہ انسان دی بنائی ہوئی پہلی شے سی جیہڑی ہیلئوسنٹرک مدار (heliocentric orbit) تک پہنچی تے ایس نوں نواں سیارہ سمجھیا گیا تے ایس دا ناں بدل کے میچتا رکھ دتا گیا ایس دا مدار زمین تے مریخ دے مدار دے درمیان واقع اے۔ لونا 1 دا ذکر خلائی راکٹ دی تریخ وچ پہلے زمین دی کشش توں نکلن والے خلائی راکٹ دے طور تے کیتا جاندا اے۔

لونا 1 خلائی گڈی وچ سائنسی آلات تے سیارچے دی طاقت دا مرکز گول شکل دے کنٹینر چ سی جس دا وزن 361 اعشاریہ 3 کلوگرام سی ایس دے اک پاسے 5 انٹینے لگے ہوئے سن۔ ایس خلائی گڈی وچ ریڈیو مواصلاتی آلات ،ٹریکنگ ٹرانسمیٹر، ٹیلی میٹری، سائنسی آلات دے 5 مختلف سیٹ سیاریاں دے درمیان خلا دے مطالعہ واسطے تے ہور دوجے آلات نصب سن۔ اس 3 منزلہ راکٹ دا کل وزن ایندھن نال 1472 کلوگرام سی۔ منصوبے موجب لونا 1 نے مشن مکمل کرن توں بعد چند نال ٹکرا کے پاش پاش ہونا سی تے دو دھاتی جھنڈیاں جناں تے سویت نشان بنے ہوئے سن چن تے پہنچانے سن۔

پرواز سودھو

لونا 1 نوں 2 جنوری 1959 نوں بیکانور خلائی اڈہ توں لونا8k72 دے ذریعے 19:41 ماسکو دے وقت دے مطابق چھڈیا گیا۔ لونا 1 سب توں پہلی انسان دی بنائی ہوئی شے سی جیہڑی زمینی مدار چھڈن دی رفتار تے پہنچی جدوں ایہہ 1472 کلوگرام وزنی 3منزلہ توں علیحدہ ہوئی۔ ایہہ راکٹ 5 اعشاریہ 4 میٹر لمبا تے 2اعشاریہ4 میٹر محیط دی گولائی دا سی۔ 3 جنوری نوں 3:56 ماسکو وقت دے مطابق زمین توں 119500 کلومیٹر دور خلائی گڈی نے وچ رکھی ہوئی 1 کلوگرام سوڈیم دے بدل چھڈے، ایہہ مٹی رنگ دی گیسی دم بحر ہند توں کسے چمکدار تارے دی وانگ کئی منٹ تک نظر آوندی رہی۔ انج ایہہ پہلا مصنوعی سیارچہ بننا۔ ایس دے فوٹو کسلوودسک شہر وچ پہاڑی تے قائم سویت سائنسی اکیڈمی دی رصدگاہ توں مستی سلاو گرینیویشیف نے کھچے۔ لونا1 4 جنوری نوں 34 گھنٹے دی پرواز توں بعد چن دی سطح توں 5995 کلومیٹر دی دوری توں لنگھیا تے زمین تے مریخ دے درمیان مدار وچ سورج دے دوالے گھمن لگ پیا۔