سلطان عمر علی سیف الدین مسجد

سلطان علی عمر سیف الدین مسجد سلطنت برونائی دے راجگھر بندر سری بیگوان چ واقع شاہی مسجد اے ۔ ایہہ خطہ ایشیا بحرالکاہل دیاں خوبصورت ترین مسجداں تے ملک دے مشہور سیاحتی مرکزاں چوں اک اے ۔ ایہہ مسجد برونائی دی پہچان سمجھی جاندی اے ۔

ایہہ مسجد برونائی دے 28ویں سلطان دے ناں نال منسوب اے ۔ اس دی تعمیر 1958ء چ مکمل ہوئی تے ایہہ جدید اسلامی طرز تعمیر دا نمونہ سمجھی جاندی اے ، جس تے اسلامی تے اطالوی طرز تعمیر دی گہری چھاپ اے ۔ ایہہ مسجد دریائے برونائی دے کنارے اک مصنوعی تالاب تے تعمیر کیتی گئی اے ۔ مسجد سنگ مرمر دے میناراں ، سنہری گنبداں ، صحناں تے سرسبز باغاں تے مشتمل اے ۔

مسجد دے مرکزی گنبد تے خالص سونے نال کم کیتا گئیا اے ۔ مسجد 52 میٹر بلندی تے واقع اے تے بندر سری بیگوان شہر دے کسے وی حصے توں باآسانی دیکھی جا سکدی اے ۔ میناراں چ جدید برقی سیڑھیاں لگیاں ہوئیاں نیں تے اتے جان دے کم آندیاں نیں ۔ مسجد دے میناراں توں شہر دا طائرانہ نظارہ قابل دید اے ۔